Tovuz, 14 iyul, Rauf Hacıyev, AZƏRTAC

İyulun 13-dən 14-nə keçən gecə və səhər saatlarında Azərbaycan-Ermənistan dövlət sərhədinin Tovuz rayonu istiqamətində şiddətli döyüşlər davam edib. Azərbaycan Ordusunun cavab tədbirləri nəticəsində böyük itkilər verən düşmən geri çəkilməyə məcbur olub. Düşmən əsasən Tovuzun Ağdam, Dondar Quşçu və Əlibəyli kəndlərini hədəf alıb.

AZƏRTAC-ın əməliyyat bölgəsində olan müxbirinin verdiyi məlumata görə, Ermənistan silahlı qüvvələri təxribatlarını davam etdirərək, kənd sakinlərini atəşə tuturlar. Dondar Quşçu kəndi artilleriya atəşinə tutularkən mərmilərdən biri də kənd sakini Fəxriyyə Zeynalovanın yaşadığı evin həyətinə düşüb. Son günlər düşmənin təxribatlarının ara vermədiyini vurğulayan F.Zeynalova bildirib: “Demək olar ki, hər gün evimizin üzərindən artilleriya mərmiləri uçur. Sonuncu dəfə güclü partlayış səsinə həyətə qaçdım, uşaqlar çöldə oynayırdılar. Qorxdum ki, onlara nə isə olar. Şükür Allaha ki, salamatçılıqdır, mərmi həyətimizdəki qarğıdalı sahəsinə düşdü. Həyətə çıxdıqda hər tərəf toz-duman idi”.

Mərminin zərbəsindən həyətdə 10 metr radiusda dərin çala yaranıb. Hadisə vaxtı ev sahibinin azyaşlı iki uşağı həyətdə olub. Xoşbəxtlikdən onlar xəsarət almayıb. Mərminin qəlpələri qonşuluqdakı evlərin pəncərələrini sındırıb, divarlarda oyuq açıb. Artilleriya atəşinə tutulan bu evin 15-20 metrliyində isə orta məktəb yerləşir.

Kəndə atılan mərmilər Əli Rüstəmovun da evinin pəncərə və divarını dəlik-deşik edib.

Mənfur düşmənin niyyəti əhalini hədəf almaqla, sakinləri qorxutmaq olsa da, Dondar quşçulular Azərbaycan əsgərinə arxayındırlar. Son günlərdə düşmənin törətdiyi təxribata Azərbaycan əsgərinin tutarlı cavab verməsi isə onların ruh yüksəkliyini daha da artırıb.

Qeyd edək ki, Ermənistan silahlı qüvvələri iyulun 12-də Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib. Daha sonra Tovuzun Ağdam və Dondar Quşçu kəndləri 120 millimetrlik minaatanlardan və D-30 topundan atəşə tutulub. Azərbaycan əsgərinin erməni təxribatına qarşı sərt cavab tədbirləri görməsi uzun çəkməyib. Düşmənin atəş mövqeləri, kəşfiyyat bölməsinin radiolokasiya stansiyası, hərbi avtomobil texnikası üçün saxlanc yeri, tank, zirehli transportyor, 20-dən çox şəxsi heyəti, tabor qərargahı və hərbi infrastrukturu bölmələrimizin dəqiq atəşi ilə darmadağın edilib.

İyulun 13-dən 14-nə keçən gecə və səhər saatlarında da Azərbaycan-Ermənistan dövlət sərhədinin Tovuz rayonu sahəsində şiddətli döyüşlər davam edib.

İki sutka ərzində düşmənə sarsıdıcı atəş zərbələri endirilib. Düşmənin 100-ə qədər canlı qüvvəsi, çoxlu sayda döyüş və nəqliyyat texnikası, mühüm obyektləri məhv edilib.

İyulun 14-də Ermənistan silahlı qüvvələri tərəfindən Azərbaycanın Tovuz rayonu istiqamətində açılmış artilleriya atəşi nəticəsində mülki şəxs həlak olub. Bu, Tovuz rayonunun Ağdam kəndinin sakini, 1944-cü il təvəllüdlü (76 yaş) Əzizov Əziz İzzət oğludur. Mülki əhalini ağır silahlardan atəşə tutmaq erməni faşizminin və barbarlığının əyani təzahürüdür.

Dondar Quşçu kəndinin sakinləri ilə söhbətimiz zamanı bildirdilər ki, onlar ön xətdə keşik çəkən əsgərlərimizə sonadək güvənirlər. Sakinlər qızğın döyüşlərin getdiyi vaxtlarda belə kəndi tərk etməyi ağıllarına gətirməyiblər. Əksinə, hər zaman ordumuza dəstək olublar. Son təxribat zamanı da kənd sakinlərinin əsgərlərimizə dəstək nümayiş etdirməsinin bir daha şahidi olduq.