Bakıda keçirilən akrobatika gimnastikası üzrə 12-ci dünya yaş qrupları yarışlarında kişi qrupların balans və temp hərəkətlərində birinci təsnifat mərhələsi başa çatıb.

AZƏRTAC xəbər verir ki, 12-18 yaş kateqoriyasında balans hərəkətində İsrail komandası 27,280 xalla birinci olub. Rusiya-2 ilk təsnifatı 27 xalla ikinci, Portuqaliya cütlüyü isə 26,060 xalla üçüncü pillədə başa vurublar.

Temp hərəkətində isə ilk iki pillədə Rusiya komandaları yer alıb. Rusiya-2 27,200 xalla birinci, Rusiya komandası isə 27,050 xalla ikinci olublar. İlk üçlüyü İsrail millisi 27 xalla tamamlayıb.

Martın 6-dək davam edəcək yarışda idmançılar 12-18 və 13-19 yaş qrupları üzrə kişi cütlükləri, qadın cütlükləri, qarışıq cütlüklər, kişi qrupları, qadın qrupları proqramında qüvvələrini sınayacaqlar.

Turnirdə Azərbaycanı 12-18 yaş kateqoriyasında Rəsul Seyidli, Rəvan Zeynallıdan ibarət kişi cütlüyü, Nəzrin Qasımova, Xanım Məmmədzadədən ibarət qadın cütlüyü, Milana Əliyeva, Nizam Xamidulindən ibarət qarışıq cütlük, Anahita Başiri, Zəhra Rəşidova, Nəzrin Zeyniyevadan ibarət qadın qrupu və 13-19 yaş kateqoriyasında Leyla Bəşirova, Nəzrin Fərmanova, Mənsumə Məmmədzadədən ibarət qadın qrupu təmsil edəcək.

Ölkəmizdə ilk dəfə təşkil olunan yarışda 24 ölkədən 438 idmançı iştirak edir.

Qeyd edək ki, yarış Azərbaycan Respublikası Nazirlər Kabinetinin xüsusi icazəsi ilə ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun, tamaşaçı iştirakı olmadan keçirilir.