Fəaliyyətə başladığı 1998-ci ildən 10 000 şagirdin təhsil aldığı, 252 məzunu olan və hazırda 953 şagirdin yüksək təhsillə təmin edilməsində müstəsna xidmətləri olan Dünya Məktəbi əsrin dörddə birini təntənə ilə qeyd edib.

AZƏRTAC xəbər verir ki, Səməd Vurğun adına Azərbaycan Dövlət Akademik Rus Dram Teatrında təşkil edilən yubiley tədbirində məktəbin yarandığı vaxtdan bu günədək keçdiyi inkişaf yolu, fəaliyyəti, şagirdləri, eyni zamanda, bu gün ölkəmizdə və onun hüdudlarından kənarda təhsil alıb, müxtəlif sahələrdə çalışan uğurlu məzunları haqqında geniş söz açılıb.

Xüsusilə vurğulanıb ki, Azərbaycan Respublikasının Prezidenti İlham Əliyevin 2013-cü il 6 avqust tarixli Sərəncamına əsasən, Xəzər Universitetinin Dünya Məktəbi 2012/2013-cü dərs ilində keçirilmiş “Ən yaxşı ümumtəhsil məktəbi” müsabiqəsinin qalibi olub. Qeyd edilib ki, Dünya Məktəbi Azərbaycan-rus, Dünya IB Məktəbi və Dünya Ana Məktəbindən ibarətdir. Tədbirdə məktəbin Sumqayıt və Gəncə şəhərlərində yerləşən filiallarının da uğurlu fəaliyyətindən bəhs edilib.

2010-cu ildən Dünya Məktəbində IB bölməsi fəaliyyətə başlayıb və bu gün öz işini Dünya IB Məktəbi adı ilə davam etdirir. Bu il yaranmasının 15 illiyini qeyd edən Dünya IB Məktəbinin 6000 nəfər şagirdi və 286 nəfər məzunu olub. Hazırda IB bölməsində 953 şagird təhsil alır. 2025-ci ildə Dünya IB Məktəbinin məzunları Stanford, Boston, Oksford, Gürcüstan, London universitetlərində təhsil alırlar.

2016-cı ildən təhsil, tədris və təlim missiyasını Sumqayıtda davam etdirən Dünya Məktəbi filial olaraq fəaliyyətə başlayıb, indiyədək ümumilikdə 2000 nəfər şagirdi və 39 nəfər məzunu olub. 2025-ci ildə orada 416 nəfər şagird təhsil alır. Sumqayıt Dünya Məktəbinin məzunları EGE Universiteti, Honqkonq Universiteti, Xəzər Universiteti, Eskişehir Osmanqazi Universiteti, Karlsuhe Texnologiya Universiteti kimi ali təhsil ocaqlarında təhsil alırlar. 2021-ci ildə Dünya Məktəbi Gəncə şəhərində öz filialını təsis edib. Bu illər ərzində məktəbdə 372 şagird təhsil alıb, hazırda məktəbin 170 şagirdi var. 2002-ci ildə Dünya Ana Məktəbi yaradılıb və indiyədək fəaliyyət göstərir. Burada təhsil alan azyaşlılar sonradan Dünya Məktəbinin ibtidai sinif bölmələrində oxuyurlar. Dünya Ana Məktəbi indiyədək 2250 şagirdi hazırlayaraq 1-ci sinfə yola salıb və hazırda151 şagirdi var.

Tədbirdə Xəzər Universiteti və Dünya Məktəbinin təsisçisi Professor Hamlet İsaxanlı, AMEA-nın prezidenti akademik İsa Həbibbəyli, Milli Məclisin deputatlarında Azay Quliyev, Dünya Məktəbinin 2010-cu ildə məzunu, Elm və Təhsil Nazirliyinin rəsmisi, II Qarabağ müharibəsi qazisi Niftalı Qasımlı Dünya Məktəbinin cəmiyyətdəki rolundan, təhsil sahəsindəki uğurlarından danışıblar.

Qeyd edək ki, tədbirdə Dünya Məktəbində uzun illər fəaliyyət göstərən əməkdaşlar təşəkkürnamələr və hədiyyələrlə təltif olunublar. Sonda çıxış edən Dünya Məktəbi MMC-nin direktoru Aygün İsayeva pedaqoji heyətə və həmkarlara ürək sözlərini söyləyib və bütün əməkdaşları təbrik edib.

Dünya Məktəbi 1998-ci ildə Professor Hamlet İsaxanlı və onun ömür-gün yoldaşı Nailəxanım İsayeva tərəfindən Xəzər Universiteti nəzdində yaradılıb. İlk olaraq burada Azərbaycan-rus bölmələri fəaliyyətə başlayıb.