Bakıda keçirilən dünya çempionatında batut gimnastikası üzrə fərdi proqramda qaliblər müəyyənləşib.

AZƏRTAC xəbər verir ki, kişilərin yarışında çinli gimnast Lanqyu Yan 61,825 xalla fəxri kürsünün ən yüksək pilləsinə qalxıb.

Yaponiya təmsilçisi Ryusei Nişioka 60,620 xalla yarışda ikinci, Belarus gimnastı Oleq Rabtsov isə 60,380 xalla üçüncü olublar.

Qadınların mübarizəsində britaniyalı Brioni Peyc 56,235 xalla qızıl medal qazanıb. Çinli Yunju Cao 55,815 xalla gümüş, Rusiya Gimnastika Federasiyasının idmançısı Lana Lebedeva 55,800 xalla bürünc medala sahib olublar.