Ulu Öndər Heydər Əliyevin xatirəsinə həsr olunmuş dövlət qurumları arasında IV minifutbol turnirinin açılış mərasimi keçirilib.

AZƏRTAC xəbər verir ki, Tennis Akademiyasında təşkil olunan tədbir iştirakçı komandaların təqdimatı ilə başlayıb. Sonra Azərbaycan Dövlət Himni səsləndirilib. Ardınca Ümummilli Lider Heydər Əliyevin və şəhidlərin xatirəsi bir dəqiqəlik sükutla yad olunub.

Gənclər və idman naziri Fərid Qayıbov turnirin ənənəvi hal aldığını bildirib: “Sevindirici haldır ki, yarışın qaliblərini beynəlxalq turnirlərə yollaya bilirik. Həqiqətən də, oyunlar yüksək səviyyədə təşkil edilir. Təşkilatçılığa görə AFFA və Azərbaycan Minifutbol Federasiyasına təşəkkürümü bildirirəm”.

Azərbaycan Minifutbol Federasiyasının icraçı vitse-prezidenti Taleh Nəsibov Ulu Öndərin xatirəsinə həsr olunmuş turnirin yüksək səviyyədə keçiriləcəyini deyib: “Bu cür turnirlər ölkəmizdə minifutbolun inkişafına müsbət təsir edir. Bu il Bakı minifutbol üzrə dünya çempionatına ev sahibliyi etdi. Sonda turnirin kubokunu milli komandamız qazandı. Əlbəttə ki, bizim üçün ən böyük məqam Prezident İlham Əliyevin yığmanı qəbul etməsi oldu. Dövlət tərəfindən idmana böyük qayğı göstərilir”.

Ardınca nümunəvi çıxışlar olub.

Daha sonra turnir açıq elan olunub. Ədliyyə Nazirliyi ilə Müdafiə Nazirliyinin komandaları arasında oyun başlanıb.

Qeyd edək ki, 45 kollektivin iştirak edəcəyi turnirdə Azərbaycan Dövlət İnformasiya Agentliyinin (AZƏRTAC) komandası da mübarizə aparacaq. AZƏRTAC D qrupunda “Azərbaycan Dəmir Yolları” QSC, Maliyyə Nazirliyi, Azərbaycan Hava Yolları, Azərbaycan Beynəlxalq Bankı, Dövlət Su Ehtiyatları Agentliyi, Fövqəladə Hallar Nazirliyi, Əmlak Məsələləri Dövlət Xidməti, Baş Prokurorluq, Qaçqınların və Məcburi Köçkünlərin İşləri üzrə Dövlət Komitəsi, Energetika Nazirliyi və Dövlət Statistika Komitəsi ilə qarşılaşacaq. Komandamız ilk oyununu noyabrın 30-da Dövlət Statistika Komitəsinə qarşı keçirəcək.