Fevralın 2-də Dövlət İmtahan Mərkəzində (DİM) “Dövlət qulluğunun inkişafına dair 2019−2025-ci illər üçün Strategiya”nın 2023−2025-ci illərdə icrası üzrə Fəaliyyət Planı müzakirə olunub.

AZƏRTAC xəbər verir ki, tədbirdə 35 dövlət orqanından 40-dan çox nümayəndə, beynəlxalq ekspertlər və Mərkəzin dövlət qulluğu sahəsində fəaliyyət göstərən struktur bölmələrinin əməkdaşları iştirak ediblər.

Tədbiri giriş sözü ilə açan DİM-in Direktorlar Şurasının sədri Məleykə Abbaszadə Azərbaycanda dövlət qulluğu sahəsində aparılan islahatlar və tətbiq edilən yeniliklər, dövlət qulluğunun inkişaf istiqamətləri və prinsipləri, “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”nın 2019−2021-ci illərdə icrası üzrə Fəaliyyət Planı çərçivəsində həyata keçirilmiş tədbirlər, habelə Strategiyanın 2023-2025-ci illər üzrə Fəaliyyət Planının icra vəziyyəti barədə iştirakçılara məlumat verib.

Daha sonra DİM-in əməkdaşları və beynəlxalq ekspertlər tərəfindən dövlət qulluğu sahəsində "Azərbaycanda dövlət qulluğu sistemində islahatlara dəstək” texniki yardım layihəsi barədə məlumat, "Dövlət qulluğunda səriştə modeli və səriştələrin təsviri”, “Dövlət qulluğunda vəzifə profilləri”, “Dövlət qulluğu sahəsində təlimlər”, "Dövlət qulluğu qanunvericiliyinin tətbiqinə dair hesabat” mövzularında təqdimatlar edilib.

Tədbirin sonunda dövlət qulluğuna dair qanunvericiliyin tətbiqi, dövlət qulluğunda səriştə modeli, dövlət qulluğu vəzifələrinin qruplaşdırılması və vəzifə profillərinin hazırlanması, dövlət qulluqçuları üçün təlimlərin təşkili ilə bağlı müzakirələr aparılıb, eyni zamanda, dövlət orqanı nümayəndələrinin sualları cavablandırılıb.

Qeyd edək ki, Azərbaycan Respublikası Prezidentinin 2022-ci il 30 dekabr tarixli Sərəncamı ilə “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”nın 2023−2025-ci illərdə icrası üzrə Fəaliyyət Planı təsdiq edilib və Mərkəzə Fəaliyyət Planında nəzərdə tutulan tədbirlərin həyata keçirilməsinin əlaqələndirilməsi tapşırılıb. Fəaliyyət Planında dövlət qulluğunda səriştə (kompetensiya) modelinin tətbiqi, institusional islahatların həyata keçirilməsi, dövlət qulluğunun informasiya təminatı və elektron dövlət qulluğunun inkişaf etdirilməsi, dövlət qulluqçularının fasiləsiz peşəkar inkişafının təmin edilməsi və digər vacib sahələr üzrə tədbirlər müəyyən edilib.