Noyabrın 18-də Dövlət İmtahan Mərkəzində (DİM) Yeni Azərbaycan Partiyasının təsis edilməsinin 30 illiyi və bu il keçirilən imtahanlarda fəaliyyəti yüksək qiymətləndirilən imtahan rəhbərləri və nəzarətçilərin mükafatlandırılmasına həsr olunan tədbir keçirilib.

AZƏRTAC xəbər verir ki, iştirakçılar tədbirdən öncə DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə və ümummilli lider Heydər Əliyevin təhsilə qayğısından bəhs edən guşə ilə tanış olublar.

Tədbirin rəsmi hissəsi Dövlət Himninin səsləndirilməsi ilə başlanıb. Ulu öndər Heydər Əliyevin və torpaqlarımızın azadlığı uğrunda canından keçmiş şəhidlərimizin xatirəsi bir dəqiqəlik sükutla yad edilib.

Sonra Yeni Azərbaycan Partiyasının yaranması və inkişaf tarixindən bəhs edən videoçarx nümayiş olunub.

İclasda çıxış edən Dövlət İmtahan Mərkəzinin Direktorlar Şurasının sədri Məleykə Abbaszadə Yeni Azərbaycan Partiyasının ölkəmizin uğurlarındakı xidmətlərindən danışıb. Sədr qeyd edib ki, bütün bu nailiyyətlərin kökündə ulu öndər Heydər Əliyev tərəfindən əsası qoyulan siyasi kurs və partiyanın Sədri, Prezident İlham Əliyevin bu siyasi kursu uğurla davam etdirməsi faktı dayanır.

M.Abbaszadə Ulu Öndərin Azərbaycan xalqı və dövləti qarşısında tarixi və misilsiz xidmətlərindən söz açıb. Hakimiyyəti illərində Ümummilli Liderin ölkəmizdə təhsilin inkişafına göstərdiyi diqqət və qayğını xüsusi qeyd edib.

Tədbirdə çıxış edən Yeni Azərbaycan Partiyasının Nəsimi rayon təşkilatının sədr müavini Abbas Pənahov təşkilatın yaradılması və inkişaf tarixi haqqında məlumat verib. A.Pənahov qeyd edib ki, YAP ötən əsrin 90-cı illərinin əvvəllərində ölkədə yaranmış mürəkkəb ictimai-siyasi vəziyyətin doğurduğu tarixi zərurətdən yaranmış təşkilatdır. Bu gün tam əminliklə demək olar ki, ötən 30 il ərzində partiyamız Azərbaycan xalqına hədsiz xidmətlər göstərib və xalqımızı, millətimizi, ölkəmizi o ağır günlərdən çıxarıb bugünkü firavan, ən əsası qalib vəziyyətə gətirib.

Daha sonra Məleykə Abbaszadə Mərkəz tərəfindən bu il keçirilən imtahanlarda müxtəlif təşkilatların, elm-təhsil müəssisələrinin nümayəndələrinin iştirakı haqqında məlumat verib. Sədr imtahanların şəffaf keçirilməsində zal nəzarətçiləri və imtahan rəhbərlərinin rolundan, gördükləri işin məsuliyyətindən, imtahanlarda daha bacarıqlı və layiqli gənclərin seçilməsində onların xidmətlərindən bəhs edib və bu işin təşkilində öz köməyini əsirgəməyən müəllimlərə DİM kollektivi adından təşəkkür edib.

İclasda daha sonra çıxış edən DİM-in Təşkilati-metodik təminat, təlimlər və regional bölmələrlə iş şöbəsinin baş məsləhətçisi Elmir Məmişov imtahanların idarəedilməsində keyfiyyət göstəricilərinin artırılması məqsədilə hər il imtahanlara cəlb edilmiş məsul şəxslərin, eləcə də zal nəzarətçisi və imtahan rəhbərlərinin fəaliyyətinin yekun qiymətləndirilməsinin aparılması ilə bağlı iştirakçılara məlumat verib.

Bu prosesə cəlb olunmuş şəxslərin qiymətləndirilməsində imtahan texnologiyasını mənimsəmə səviyyəsi, auditoriyanı idarəetmə bacarığı, imtahan sənədləri ilə aparılan işin keyfiyyəti, köçürmə halları və digər qayda pozuntularının aradan qaldırılması, onların ümumilikdə imtahanlarda fəal iştirakı və əvvəlki imtahanlarda əldə etdiyi keyfiyyət göstəriciləri, 600-dən yuxarı bal toplamış abituriyentlərin sorğu-anketlərində zal nəzarətçisi haqqında rəylər nəzərə alınır.

Qeyd edək ki, araşdırmanın nəticələrinə əsasən, nümunəvi fəaliyyətinə görə 1830 nəzarətçi müəllimə təşəkkür elan edilib, o cümlədən 30 zal nəzarətçisi, 5 imtahan rəhbəri fəxri fərmanla təltif edilib. Bundan əlavə, müəllimlərə hədiyyə olaraq DİM nəşrlərindən ibarət kitablar da verilib