Oktyabrın 31-də Dövlət İmtahan Mərkəzi (DİM) və “YAŞAT” Fondu şəhid övladları ilə görüş təşkil edib.

AZƏRTAC xəbər verir ki, görüşün keçirilməsində məqsəd buraxılış və qəbul imtahanlarına hazırlaşan şəhid övladlarının təhsilinə, gələcək karyeralarının planlaşdırılmasına və inkişafına əməli yardım göstərmək və onlara mənəvi dəstək olmaqdır.

Tədbirdə Bakı, Abşeron, Sumqayıt məktəblərinin IX-XI siniflərində təhsil alan 70-dən çox şəhid övladı iştirak edib.

Görüşdən əvvəl şagirdlər DİM-də yaradılmış muzeylə tanış olublar. Daha sonra Mərkəzin əməkdaşları tərəfindən iştirakçılar üçün “Psixoloji maarifləndirmə və erkən yaşda peşə seçimi haqqında” təqdimat nümayiş etdirilib. Şagirdlərə DİM tərəfindən nəşr olunan dərs vəsaitləri (test topluları, fənlər üzrə qiymətləndirmə tapşırıqları) hədiyyə edilib. Həmçinin DİM-in regional bölmələri vasitəsilə müxtəlif rayonlar üzrə 100-dən artıq şagirdə imtahana hazırlaşdıqları fənn və ixtisas qruplarına uyğun 820, respublika üzrə ümumilikdə 1370 dərs vəsaiti təqdim edilib.

DİM-in İdarə Heyətinin sədri Məleykə Abbaszadə Prezident, Ali Baş Komandan İlham Əliyevin rəhbərliyi ilə torpaqlarımızın düşmən tapdağından azad olunması və ordumuzun qəhrəmanlığı haqqında danışıb, həmçinin şəhidlərimizin ailə üzvlərinin və qazilərimizin daim dövlətin diqqət və qayğısı altında olacağından bəhs edib. Sədr, həmçinin 2021-ci ilin sonlarından etibarən DİM və “YAŞAT” Fondu arasında imzalanmış memorandum çərçivəsində şəhid ailələrinin üzvləri və qazilərimizin iştirakı ilə Bakıda və regionlarda həyata keçirilən tədbirlər, buraxılış və qəbul imtahanlarına hazırlaşan abituriyentlərə göstərilən elmi-metodiki, həmçinin psixoloji dəstək xidmətləri haqqında məlumat verib. Məleykə Abbaszadə qeyd edib ki, bu müddət ərzində “YAŞAT” Fondunun DİM-ə təqdim etdiyi siyahıya uyğun olaraq respublikamızın əksər şəhər və rayonlarında görüşlər təşkil olunub, şəhid övladlarına və qazilərə ümumilikdə 5 mindən artıq vəsait hədiyyə edilib.

“YAŞAT” Fondunun rəhbəri Elvin Hüseynov Vətən müharibəsi iştirakçılarının təhsilinə dövlət tərəfindən göstərilən diqqət və qayğıdan, Dövlət İmtahan Mərkəzi ilə birlikdə görülən işlərdən danışıb.