Yanvarın 30-da Dövlət Gömrük Komitəsinin Vətən müharibəsində şəhid olan əməkdaşı Ülvi Hacıyevin xatirəsinə həsr olunmuş "Ən yüksək rütbəli gömrükçü" anım mərasimi keçirilib.

AZƏRTAC xəbər verir ki, tədbir Azərbaycan Respublikası gömrük orqanlarının yaradılmasının 30-cu ildönümü və gömrük əməkdaşlarının peşə bayramı günündə təşkil olunub.

Mərasimdə əvvəlcə Dövlət Himni səsləndirilib, sonra şəhidlərin əziz xatirəsi bir dəqiqəlik sükutla yad edilib.

Daha sonra Vətən müharibəsi şəhidinin şərəfli həyat yolu haqqında məlumat verilib. Bildirilib ki, Ülvi Hacıyev 2020-ci ilin iyul ayında Ermənistanın Tovuz rayonu istiqamətindəki təxribatdan sonra könüllü olaraq orduya yazılıb. Müharibənin ilk günlərindən cəbhəyə yollanan Ülvi Hacıyev Füzuli, Cəbrayıl, Xocavənd rayonları və Hadrut uğrunda gedən döyüşlərdə qəhrəmanlıq göstərib. Oktyabrın 19-da Şuşa şəhərinin 10 kilometrliyində baş verən döyüşlər zamanı şəhidlik zirvəsinə ucalıb. Azərbaycan Prezidenti İlham Əliyevin müvafiq sərəncamları ilə ölümündən sonra “Vətən uğrunda”, “Cəsur döyüşçü”, “Füzulinin azad olunmasına görə”, “Xocavəndin azad olunmasına görə” medalları ilə təltif olunub.

Anım mərasimində Milli Məclisin deputatı Rəşad Mahmudov 44 günlük Vətən müharibəsində Ali Baş Komandan İlham Əliyevin rəhbərliyi ilə Azərbaycan Ordusunun qazandığı parlaq Qələbədən danışıb. Qeyd olunub ki, şəhidlərimizin və qazilərimizin canı, qanı bahasına 30 ildir düşmən tapdağında olan torpaqlarımız azad olundu, dünyaya nəyə qadir olduğumuzu sübut etdik. O, şəhidlərimizin şərəfli həyat yolunun gələcək nəsillər tərəfindən davam etdiriləcəyini və azad edilən ərazilərimizin göz-bəbəyi kimi qorunub saxlanılacağını diqqətə çatdırıb.

Dövlət Gömrük Komitəsinin əməkdaşları general-mayor Təmkin Xəlilov, Fərhad Babayev, Aydan Kərimova şəhid gömrük işçisi Ülvi Hacıyevin öz işini sevdiyini və nümunəvi işçi olduğunu qeyd ediblər. Bildirilib ki, hər kəsə nəsib olmayan şəhidlik məqamı bütün rütbə və zirvələrdən yüksəkdir. Müqəddəs amallar uğrunda həmin zirvəni fəth edənlərin ölmədiyi və əbədiyyət qazandığı diqqətə çatdırılıb. Çıxış edənlər dövlətimiz tərəfindən şəhid ailələrinə göstərilən diqqət və qayğıdan bəhs edib, şəhidlərimizin xatirəsinin əbədiləşdirilməsi istiqamətində atılan addımlardan söhbət açıblar. Şəhidlərin əziz xatirəsinin qədirbilən xalqımız tərəfindən daim yaşadılacağı, onların şərəfli həyat və döyüş yolunun gələcək nəsillərə örnək olacağı qeyd edilib.

Sonra şəhidin atası Şirin Hacıyevə Dövlət Gömrük Komitəsinin 30 illiyi yubiley medalı təqdim edilib.

Xalq artisti Fidan Hacıyeva, Xalq şairi Vahid Əziz, şəhid pilot, polkovnik-leytenant Rəşad Atakişiyevin həyat yoldaşı Könül Hüseynova və başqaları çıxış edərək Azərbaycan Ordusunun 44 gün ərzində tarix yazdığını, alnımızdakı ləkənin şəhid və qazilərin canı, qanı bahasına təmizləndiyini vurğulayıblar. Çıxış edənlər 44 günün qəhrəmanlarının bir zamanlar yıxılan qürurumuzu dirçəltdiyini qeyd ediblər.

V.Əziz içərisində Ülvi Hacıyevə həsr olunan şeirin də yer aldığı kitabını şəhidin anası Həmidə Qurbanovaya təqdim edib.

Ülvi Hacıyevin döyüş yoluna dair videoçarx nümayiş olunub, silahdaşları onunla bağlı xatirələrini bölüşüblər.

Sonda şəhidin anası Həmidə Qurbanova çıxış edərək gömrük əməkdaşlarının peşə bayramlarını təbrik edib, tədbiri təşkil edənlərə minnətdarlığını bildirib. "Ülvi cəbhəyə könüllü getdi, şəhid olmaq isə öz arzusu idi. Oğlum öz arzusuna çatdı. Mən onunla həmişə fəxr etmişəm. Şəhadəti ilə duyduğum fəxarət və qürur hissini dəfələrlə artırdı. Elə bir oğulu itirmək nə qədər çətin olsa da, mən daim başımı dik tutacağam", - deyə H.Qurbanova bildirib.

Mərasimdə, həmçinin bədii hissə nümayiş etdirilib, mahnı və şeirlər səsləndirilib.