Prezident İlham Əliyevin iştirakı ilə 2016-cı il avqustun 10-da Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan Qəbələ regional “ASAN xidmət" mərkəzinin açılışı olub. Mərkəz elə həmin ayda da fəaliyyətə başlayıb.

Mərkəz müvafiq xidmətlər üzrə qeydiyyat məhdudiyyəti olmadan vətəndaşlara xidmət göstərir.

Agentliyin İctimaiyyətlə əlaqələr şöbəsindən AZƏRTAC-a bildiriblər ki, 4 illik fəaliyyəti dövründə mərkəzə, ümumilikdə, 550 mindən çox vətəndaş müraciəti daxil olub. Eyni zamanda, Səyyar "ASAN xidmət" avtobusu vasitəsilə 131 min 765, mobil səyyar vasitəsilə Qəbələ, İsmayıllı, Oğuz, Şamaxı, Zaqatala, Balakən, Zərdab, Ucar, Şəki və Qax rayonlarının kənd və qəsəbələrində 25 mindən çox vətəndaş müraciəti qəbul olunub.

Gündəlik orta müraciət sayı 530-a yaxındır.

Qəbələ regional “ASAN xidmət“ mərkəzində 497 nəfər könüllü fəaliyyət göstərib, onlardan 465 nəfəri məzun, 32 nəfər isə cari könüllüdür. Bu dövr ərzində könüllülərin iştirakı ilə müxtəlif sosial layihələr, teatr, tamaşalar, idman yarışları intellektual oyunlar, xeyriyyə aksiyaları, tarix və mədəniyyət abidələrinə ekskursiyalar təşkil olunub.