Biz hər il hər nəsil məzunların təhsil trayektoriyasını izləyirik. 2010-ci ildə 1-ci sinfə gedənlərin sayı 119 851 nəfər idi. Onlar arasında 9-cu sinfə çatmayanların sayı 6 faizə düşüb. 9-cu sinfi bitirəndən sonra məktəbi tərk edən 15 faiz olub. Əvvəl 19 faiz idi. Ali məktəbə sənəd verməyənlər 15 faiz olub. Əvvəl 22 faiz idi. Beləliklə, ali təhsil almaq istəyənlərin sayı artır. 2010-cu ildə birinci sinfə gedənlərdən 31,2 faizi ali məktəbə qəbul olub.

AZƏRTAC xəbər verir ki, bunu “Abituriyent” jurnalının 12-ci nömrəsinin təqdimat mərasimində Dövlət İmtahan Mərkəzinin Direktorlar Şurasının sədri Məleykə Abbaszadə söyləyib.

Jurnalın bu nömrəsində 2021-ci il üçün Azərbaycan Respublikasının ali və orta ixtisas təhsili müəssisələrinə tələbə qəbulu və ümumtəhsil müəssisələri üzrə buraxılış imtahanları nəticələrinə dair elmi-statistik materialları dərc edilib.