Martın 6-da AMEA-nın akademik Ziya Bünyadov adına Şərqşünaslıq İnstitutunda görkəmli oftalmoloq-alim, Əməkdar elm xadimi, professor, tibb elmləri doktoru, akademik Zərifə Əliyevanın anadan olmasının 100 illik yubileyinə həsr edilən “Dəyişən dünyada qadın: Şərq və Qərb baxışı” mövzusunda ikigünlük beynəlxalq elmi konfransı işə başlayıb.

AZƏRTAC xəbər verir ki, konfrans Şərqşünaslıq İnstitutu ilə yanaşı, Misir Ərəb Respublikası Bint Bələd qubernatorluğu Qadınlar Cəmiyyətinin, Rusiya Federasiyası Tarix, İqtisadiyyat və Hüquq Elmi-Tədqiqat İnstitutunun, Qazaxıstan Respublikası Təhsil və Elm Nazirliyi R.B.Süleymanov adına Şərqşünaslıq İnstitutunun, İraq Strateji Araşdırmalar Mərkəzinin və Çin Xalq Respublikasının Hebey Universitetinin iştirakı ilə təşkil olunub. Konfransda Azərbaycan, Qazaxıstan, Misir, Mərakeş, İraq, Livan, Malayziya, Çin, Ukrayna, Rusiya və Belarusdan ümumilikdə 170-ə yaxın alim iştirak edir.

Konfransda AMEA-nın prezidenti akademik İsa Həbibbəyl, Şərqşünaslıq İnstitutunun baş direktoru akademik Gövhər Baxşəliyeva çıxış ediblər.

Qeyd olunub ki, akademik Zərifə Əliyeva Azərbaycanda oftalmologiya sahəsində elmi məktəb yaratmış görkəmli alimlərimizdən biridir. Görkəmli elm xadimi oftalmologiyanın aktual problemləri ilə dərindən məşğul olub. Onun elmi yaradıcılığında qlaukomanın və görmə orqanının iltihabının müalicəsi məsələsi xüsusi yer tutub.