Daniel Abbasov və Murad Rəfiyevdən ibarət kişi cütlüyümüz Bakıda keçirilən akrobatika gimnastikası üzrə 28-ci dünya çempionatında ikinci bürünc medala sahib olub.

AZƏRTAC xəbər verir ki, cütlüyümüzün temp hərəkəti üzrə final mərhələsində çıxışı 27,500 xalla qiymətləndirilib.

Yarışın qalibi ABŞ akrobatları olub – 28,180 xal. Qazaxıstanlı cütlük 28,030 xalla yarışı ikinci pillədə başa vurub.

Cütlüyümüz ötən gün qarışıq hərəkətdə də üçüncü olmuşdu.

Çempionatda 17 ölkədən 170 gimnast iştirak edir.

Dörd gün davam edəcək yarışda idmançılar qadın, kişi və qarışıq cütlükləri, eləcə də qadın və kişi qrupları proqramlarında balans, temp və qarışıq hərəkətlər üzrə çıxış edəcəklər.

Xatırladaq ki, 2018-ci ildə Azərbaycan ilk dəfə akrobatika gimnastikası üzrə dünya kuboku turnirinə, bu il martın 3-dən 6-dək isə 12-ci dünya yaş qrupları yarışlarına ev sahibliyi edib.