Mayın 27-də Azərbaycan Hərb Tarixi Muzeyində (AHTM) “Şərqdə doğan günəş - Azərbaycan Xalq Cümhuriyyəti” mövzusunda tədbir keçirilib.

AZƏRTAC xəbər verir ki, Cümhuriyyətin yaradılmasının 103-cü ildönümünə həsr olunan tədbirdə əvvəlcə Azərbaycan Respublikasının Dövlət Himni səsləndirilib, şəhidlərimizin ruhu bir dəqiqəlik sükutla yad edilib.

Muzeyin rəisi, ehtiyatda olan polkovnik Əzizağa Qənizadə bu mövzuda məruzə ilə çıxış edib. Bildirib ki, Şərqdə ilk demokratik respublika olan Azərbaycan Xalq Cümhuriyyətinin yaranması xalqımızın milli azadlıq mübarizəsinin məntiqi nəticəsi idi. Xalqımızın milli oyanışını və dirçəlişini təcəssüm etdirən, Azərbaycanın milli dövlətçilik ənənələrini daha da zənginləşdirən Xalq Cümhuriyyəti cəmi 23 ay yaşasa da, tarixdə silinməz iz qoyub. Azərbaycan Xalq Cümhuriyyəti ölkəmizin daxilində və xaricində yaranmış gərgin və mürəkkəb ictimai-siyasi şəraitdə fəaliyyət göstərib. Bu respublika mövcud olduğu 23 aylıq qısa müddətdə demokratik dövlət və ordu quruculuğu, iqtisadiyyat, təhsil, mədəniyyət və digər sahələrdə mühüm islahatlar həyata keçirib.

AHTM-nin tədqiqatçı baş elmi işçisi Vahid İsmayılov çıxış edərək Azərbaycan Xalq Cümhuriyyətinin xalqımızın qədim dövlətçilik tarixinin şanlı səhifələrindən olduğunu diqqətə çatdırıb. O, Azərbaycan Xalq Cümhuriyyətinin hüquqi varisi olan müstəqil respublikamızın əldə etdiyi mühüm uğurlardan danışıb.

Sonda Azərbaycan Xalq Cümhuriyyətinə həsr olunan qısametrajlı sənədli film nümayiş etdirilib, hərbi vətənpərvərlik mövzusunda mahnılar səsləndirilib.

Tədbirdə Müdafiə Nazirliyinin, Silahlı Qüvvələrin Hərbi Akademiyasının, ali hərbi məktəblərin, şəhər muzeylərinin və əlaqədar təşkilatların nümayəndələri iştirak ediblər.