Çinli kişi batutçu Lanqyu Yan Bakıda təşkil olunan dünya çempionatının təsnifat mərhələsində liderliyi ələ alıb.

AZƏRTAC xəbər verir ki, gimnastın çıxışı 112,885 xalla qiymətləndirilib. Onun komanda yoldaşı Tonq Bao isə 111,315 xalla ikincidir. İlk üçlüyü Yaponiya təmsilçisi Hiroto Unno 109,670 xalla tamamlayır.

Hazırda kişi batutçular arasında fərdi proqram üzrə təsnifat mərhələsi davam edir.

Noyabrın 21-dək davam edəcək dünya çempionatında 33 ölkədən 300-dək gimnast iştirak edir. Çempionatda gimnastlar batut üzərində fərdi və sinxron tullanışlar, tamblinq və ikili minibatut üzrə proqramlarda çıxış edəcəklər. Bundan əlavə, komanda çoxnövçülüyü, eləcə də hər proqram üzrə komanda hesabında qaliblər müəyyənləşəcək.

Yarışların ilk iki günü təsnifat, sonuncu iki gün isə finallar keçiriləcək. Qaydalara əsasən, bir iştirakçı bir neçə proqramda çıxış edə bilər.