"Birinci festivalın uğurlu alınması bu işi davam etdirməyimizə şərait yaratdı".

AZƏRTAC xəbər verir ki, bu sözləri Milli Olimpiya Komitəsinin (MOK) vitse-prezidenti Çingiz Hüseynzadə qurumun təsis etdiyi "İdman Filmləri və Proqramları Milli Televiziya Festivalı"na həsr olunmuş mətbuat konfransından sonra jurnalistlərə açıqlamasında deyib.

O, festivalın ilk dəfə MOK-un 30 illik yubileyi ilə bağlı təşkil olunduğunu bildirib: "Biz yeni layihələri üzə çıxarmağa çalışırıq. Qısa zamanda çox material ərsəyə gətirmək çətin olduğuna görə festivalı iki ildən bir təşkil etməyi qərara aldıq. Yanvarın 16-da isə hazırkı layihənin açılışı olacaq".

Festivalın əhəmiyyətindən söz açan Ç. Hüseynzadə əlavə edib: "Bilirsiniz ki, biz hər zaman Olimpiya idman növlərinin inkişafı üçün çalışmışıq. Bu festivalın təşkil olunmasında da əsas məqsəd odur ki, telekanallar və federasiyaların bu işdə fəal iştirakı üçün motivasiya olsun".

Onun sözlərinə görə, son illər mediada idmançılarla bağlı proqramların sayı artıb: "Əvvəl idmançılar haqqında materiallar az idi. Bu da bəzi problemlər yaradırdı. Bu işi daha da genişləndirmək üçün hazırkı layihəni təşkil edirik".