Bu gün biz, nəinki ədəbiyyatımızın, həm də milli kinomuzun əfsanələrindən biri olan, xalqımızın böyük şəxsiyyəti Rüstəm İbrahimbəyovu son mənzilə yola salırıq. O, dünyada 6 ölkənin mükafatını almış yeganə adamdı. Rüstəm İbrahimbəyov hər zaman öz sözünü deməyi bacarıb.

AZƏRTAC xəbər verir ki, bu sözləri Xalq yazıçısı Çingiz Abdullayev Rüstəm İbrahimbəyovun dəfni mərasimində deyib.

“Xatırlayıram ki, 1990-cı ildə Rüstəm İbrahimbəyov məndən 10 nüsxə “Qara Yanvar” kitabını istəmişdi. O, kitabda olan dəhşətli şəkilləri Fransa və ABŞ ictimaiyyətinə göstərmək niyyətində idi. Kitabları sərhəddən keçirə bilməyəcəyini ona bildirəndə, o, cavabında SSRİ-nin deputatı olduğu üçün onu yoxlamayacaqlarını söyləmişdi. Bu gün bizə ABŞ, Fransa, Almaniya, hətta Rusiya və Ukraynadan məktublar gəlir və bu zaman başa düşürsən ki, necə də böyük bir insanı itirmişik”,- deyə Çingiz Abdullayev vurğulayıb.