Azərbaycan Respublikası Minatəmizləmə Agentliyində (ANAMA) brifinq keçirilib.

AZƏRTAC xəbər verir ki, Agentliyin Operativ Qərargah rəisi İdris İsmayılov sentyabrın 27-dən bu günədək dörd agentlik əməkdaşının mina axtarışları zamanı xəsarət aldığı barədə məlumat verib. Bildirilib ki, cəbhəboyu ərazilərdə mülki əhalinin işğaldan azad olunmuş ərazilərə qanunsuz şəkildə keçməsi ilə bağlı 29 mina partlama halı qeydə alınıb. Bu zaman 17 nəfər müxtəlif dərəcəli xəsarət alıb, 12 nəfər isə həlak olub.

İ.İsmayılov qeyd edib ki, ANAMA tərəfindən cəbhəboyu ərazilər və işğaldan azad olunmuş ərazilərdə yüzlərlə mina və partlamamış hərbi sursatlar aşkarlanıb və zərərsizləşdirilib. 17 milyon kvadratmetr ərazi mina və partlamamış hərbi sursatdan təmizlənib. Sentyabrın 27-dən bu günədək 17 327 ədəd mina və hərbi sursat aşkarlanıb. Hazırda Füzuli, Cəbrayıl, Qubadlı, Şuşa, Xocavənddə axtarışlar aparılır.

Tədbirdə məlumat verilib ki, eyni zamanda, Beynəlxalq Həkimlər Dərnəyi (AID) Azərbaycanın Vətən müharibəsində xəsarət alan şəxslərin protezlə təmin olunması ilə bağlı layihə həyata keçirir.

Bununla bağlı çıxış edən AİD-in sədri Mevlit Yurtseven bildirib ki, Vətən müharibəsi zamanı xəsarət alan bəzi şəxslər müalicə üçün Türkiyəyə aparılacaq. AID 2011-ci ildə İstanbulda qurulmuş beynəlxalq təşkilatdır. Təşkilat əzalarını itirmiş insanlara protez mərkəzləri ilə dəstək göstərir: “Əzalarını itirən Azərbaycan vətəndaşları üçün də xidmət göstərməyə hazırıq. Azərbaycan xalqı ilə qardaşlığımızın əlaməti olaraq bir qrup xəstə Türkiyəyə aparılacaq və orada müalicə olunaraq protezlərlə təmin olunacaq. Ötən həftə mütəxəssis həkimlər və onların nümayəndə heyəti ilə Azərbaycana gəldik və yoxlamalar apardıq”.

Həkim professor Yaşar Tatar isə qeyd edib ki, bu layihə Azərbaycan xalqı ilə qardaşlığı göstərmək üçündür. Azərbaycan özü də bu protezləri hazırlaya bilər, amma müharibə nəticəsində çoxlu sayda yaralı var. Bu şəxsləri erkən vaxtlardan protezlə təmin etmək onların şəraitini yaxşılaşdırır. Layihədə 12 nəfərə 15 protez yazılacaq. Bu protezlər ən müasir üsullarla hazırlanıb. İlk olaraq 5 nəfər Türkiyəyə aparılacaq, bu şəxsləri geri qayıdanda hətta futbol oynaya biləcək formada görə biləcəksiniz. Burada ANAMA bizə dəstək edir. Həmin şəxslər geri qayıdanda normal həyatlarına qayıdacaq. Qeyd edilib ki, Türkiyəyə ilk olaraq aparılacaq 5 şəxsdən ikisi xəsarət alan ANAMA əməkdaşıdır.