Bu il 193 min nəfərin əlillik müddəti başa çatır. İndiyədək onlardan 130 min nəfərinin sənədləri rəsmi olaraq elektron qeydiyyatdan keçib. İlin 8 ayında 35 min nəfərin əlillik təyinatı aparılıb. Bunun 11 mini ilkin, qalanları isə təkrar əlillik təyinatıdır. Sağlamlıq imkanları məhdud 6 min 711 nəfər uşaq da onların arasındadır. Müqayisə üçün qeyd edim ki, ötən il əlillik təyinatı ilə əlaqədar 78 min müraciət edilib və onların 25 min nəfərinə əlillik təyinatı verilib.

AZƏRTAC xəbər verir ki, Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyinin sədri Anar Bayramov bu barədə əlilliyin qiymətləndirilməsi və əlilliyi olan şəxslərə tibbi-sosial reabilitasiya xidmətlərinin göstərilməsi məsələlərinə həsr olunmuş mətbuat konfransında deyib.

Onun verdiyi məlumata görə, son üç ildə 17 minə yaxın saxta əlillik təyinatı ləğv edilib. Bu il saxta əlilliyə dair 266 nəfərin sənədləri Baş Prokurorluğa göndərilib. Agentlik sədri deyib: “Əlilliyin qiymətləndirilməsinin obyektivliyi və düzgünlüyü 88 nömrəli formada əksini tapmış məlumatlardan bilavasitə asılıdır. Həmin formada məlumatların natamam əks olunduğu halda müəyyən problemlər yarana bilər. Belə uyğunsuzluqlar olduğu halda vətəndaşların əyani olaraq komissiyadan keçmək hüququ var. Onların buna öz istəkləri ilə də müraciət etmək hüququ var və agentlik tərəfindən də dəvət oluna bilərlər. Komissiyalar həmin müraciətləri tam şəffaf və obyektiv şəkildə araşdırır və bu zaman videoçəkilişlər də aparılır”.