Dekabrın 9-da Şuşa rayonunda iki mülki şəxsin həlak olması ilə nəticələnən hadisə ermənilərin mina terrorunun nəticəsidir. Mina bilərəkdən altdan tank əleyhinə, üzərindən isə piyada əleyhinə elə quraşdırılıb ki, hadisə zamanı minaya düşən şəxsin sağ qalma ehtimalı olmasın. Bu kombinasiyanın məqsədi həm də daha çox insanın ölməsi üçün partlayışın dalğasını maksimum artırmaqdır.

Bunu Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov AZƏRTAC-a müsahibəsində deyib.

C.Xəlilov bildirib ki, bu cür “sürpriz minalar”dan adətən diversiya, terror aktları zamanı istifadə olunur. Bu, Ermənistan tərəfinin terrorçu niyyətinin bariz nümunəsidir. Ümumilikdə bu günədək Ermənistan tərəfindən təqdim olunmuş minalanmış ərazilərin xəritələri qeyri-dəqiqdir. Bu, o deməkdir ki, Ermənistan məqsədli şəkildə Azərbaycanın daha çox dinc sakinini öldürməyə cəhd göstərir. Ağdam, Füzuli və Zəngilan rayonları üzrə öncə verilmiş mina sahələri üzrə məlumatların dəqiqliyi 25 faiz təşkil edir. Bu günlərdə təqdim edilmiş digər ərazilərdəki mina sahələrinin formulyarlarının da ilkin tanışlıqdan sonra etibarsız, yararsız və qeyri-dəqiq olması təsəvvürü yaranıb. Ermənistanın bu çirkin addımlarla əsas məqsədi işğaldan azad olunmuş ərazilərdə dinc həyatın bərpasına, insanların öz yurdlarına qayıtmasına mane olmaq, bölgədə hərbi gərginliyin aradan qalxmasına imkan verməməkdir.

Ermənistanın bütün dövrlərdə - Xocalıdan tutmuş Gəncənin və Bərdənin bombalanmasına qədər daim dinc sakinləri və mülki şəxsləri hədəfə aldığını vurğulayan ehtiyatda olan polkovnik deyib: “Ermənistanın milli ideologiyası Türkiyəyə və Azərbaycana qarşı terror və nifrət üzərində qurulub. Qeyri-dəqiq xəritələr, ağır texnikanın keçmədiyi ərazilərdə, o cümlədən meşələrdə tank əleyhinə mina “tələ”lərinin, ölüm ehtimalını artıran “mina-sürprizlər”in quraşdırılması Ermənistanın dövlət səviyyəsində mina terroru həyata keçirdiyini bir daha sübut edir. Ermənistan tərəfinin bütün cəhdlərinə baxmayaraq, biz torpaqlarımızı minalardan təmizləyəcəyik və onu təhlükəsiz edəcəyik. Azərbaycan öz ərazilərinin minalardan təmizlənməsi işində BMT və digər beynəlxalq təşkilatlardan daha fəal dəstək gözləyir”.