bp Azərbaycan şirkəti ilə Milli Olimpiya Komitəsi (MOK) və Milli Paralimpiya Komitəsi (MPK) arasında mövcud tərəfdaşlığın müddətinin uzadılmasına dair rəsmi imzalanma mərasimi keçirilib.

MOK-dan AZƏRTAC-a bildiriblər ki, yeni sazişə əsasən, bp 2028-ci ilin sonunadək ölkənin milli Olimpiya və Paralimpiya komandalarına dəstəyini davam etdirəcək.

bp ilə MOK və MPK arasında tərəfdaşlıq 2012-ci ilin yanvar ayında – “London-2012” Yay Olimpiya Oyunları ərəfəsində qurulub.

Tərəfdaşlıq bu illər ərzində bir neçə dəfə - 2013, 2016 və 2024-cü illərdə uzadılıb. 2028-ci ilə qədər uzadılan yeni saziş ölkədə idmanın inkişafına və idmançılara dəstəyin davam etdirilməsinə xidmət edəcək.

Milli Olimpiya Komitəsinin vitse-prezidenti Çingiz Hüseynzadə bp-nin Azərbaycan idmanına göstərdiyi uzunmüddətli və ardıcıl dəstəyin xüsusi əhəmiyyət kəsb etdiyini vurğulayıb. O qeyd edib ki, bu tərəfdaşlıq ölkənin idman həyatında önəmli rol oynamaqla yanaşı, Azərbaycan idmanının beynəlxalq arenada tanınmasına və mövqeyinin möhkəmlənməsinə də mühüm töhfə verir: "bp-nin Azərbaycandakı tarixi ilə Milli Olimpiya Komitəsinin tarixi üst-üstə düşür. 30 ilə yaxındır ki, Milli Olimpiya Komitəsi və bp Azərbaycan şirkəti paralel şəkildə böyük inkişaf yolu keçib. Bu illər ərzində Azərbaycan idmanında xüsusilə də Olimpiya Oyunlarında böyük uğurlar qazanılıb. Əgər bp-nin uğurları iqtisadi nəticələrlə ölçülürsə, MOK-un uğurları da Olimpiya Oyunlarında qazanılan medallarla ölçülür. bp Azərbaycan şirkəti ilə əməkdaşlığımız “London-2012” Yay Olimpiya Oyunlarından başlayıb. Həmin vaxtdan etibarən bp bütün Olimpiya Oyunlarında yanımızdadır və bizimlə əməkdaşlıq edir. Biz bu əməkdaşlıqdan məmnunluq duyuruq. İnanıram ki, bu əməkdaşlığı bundan sonra da davam etdirə bilərik. Hər üç tərəfə - Milli Olimpiya Komitəsinə, Milli Paralimpiya Komitəsinə və bp Azərbaycan şirkətinə minnətdarlığımı bildirirəm”.

Milli Paralimpiya Komitəsinin prezidenti Hidayət Abdullayev bildirib ki, bp-nin təşəbbüsü və dəstəyi paralimpiyaçıların hazırlıq imkanlarını genişləndirir və onların uğur qazanmasına töhfə verir: “bp Azərbaycan şirkəti hər zaman sosial və ictimai layihələrdə yaxından iştirak edir. İdmana olan bu dəstək sayəsində paralimpiyaçılarımız müxtəlif yarışlarda uğurlara imza atıblar. Birgə əməkdaşlığa və dəstəyə görə bp şirkətinə minnətdarlığımızı bildiririk”.

bp-nin Xəzər regionu üzrə vitse-prezidenti Bəxtiyar Aslanbəylinin sözlərinə görə, şirkət Azərbaycanda idmanın inkişafına uzunmüddətli dəstəyini davam etdirəcək: “bp Azərbaycan şirkəti artıq 30 ildən çoxdur ki, neft-qaz sənayesinə töhfəsini verir. Bundan əlavə şirkətimiz sosial layihələrdə də fəal iştirak edir. Biz idman sahəsinə də diqqət yetiririk. 2012-ci ildən başlayaraq, ölkənin olimpiya və paralimpiya komandalarına dəstək göstərir, idmançılar üçün imkanlar yaradır və Azərbaycanın beynəlxalq arenada uğurlarında payımızın olması üçün çalışırıq. Bu tərəfdaşlıq çərçivəsində çalışırıq ki, Azərbaycan idmanına da kiçik bir töhfəmiz olsun. İnanıram ki, həyata keçirilən fəaliyyətlər bundan sonra da davam etdiriləcək”.

Rəsmi çıxışlardan sonra bp-nin Xəzər regionu üzrə vitse-prezidenti Bəxtiyar Aslanbəyli MOK-un vitse-prezidenti Çingiz Hüseynzadə və MPK-nın rəhbəri Hidayət Abdullayev ilə tərəfdaşlıq sazişi imzalayıb.

Qeyd edək ki, indiyədək bu tərəfdaşlıq çərçivəsində bp Azərbaycanın çoxsaylı iri beynəlxalq idman tədbirlərində, o cümlədən “London-2012”, “Bakı-2015” I Avropa Oyunları, “Rio-2016”, “Bakı-2017” IV İslam Həmrəyliyi Oyunları, “Tokio-2020” və “Paris 2024” Oyunlarında iştirakını dəstəkləyib.

Yeni tərəfdaşlıq sazişi bp-nin Azərbaycanda idmanın inkişafına verdiyi töhfənin davamı olaraq, qarşıdakı illərdə Olimpiya və Paralimpiya komandalarının uğurlarına daha böyük dəstək olacaq.