Sentyabrın 7-də Bakıda Birləşmiş Millətlər Təşkilatının Miqrasiya Agentliyi olan Beynəlxalq Miqrasiya Təşkilatının (BMqT) Azərbaycan nümayəndəliyi hüquqşünaslar üçün insan alveri, məcburi əməyin və insan alverinin potensial qurbanlarına yardımla bağlı təlimə başlayıb.

AZƏRTAC xəbər verir ki, ABŞ-ın Beynəlxalq İnkişaf Agentliyinin (USAID) maliyyələşdirdiyi və Vəkillər Kollegiyasının Hüquqi Yardım və Təlim Mərkəzinin dəstəyi ilə keçirilən dördgünlük təlim “İnsan alverinə qarşı mübarizə üzrə fəaliyyət” layihəsi çərçivəsində təşkil olunur.

Hüquqşünaslar üçün keçirilən təlim proqramı insan alveri problemi və onun qurbanlarına yardım məsələlərini əhatə edir.

Təlimlərin açılışında BMqT-nin Azərbaycandakı nümayəndəliyinin rəhbəri Vladimir Qyorqiyev çıxış edərək bildirib ki, 2015-ci ildən insan alverinə qarşı mübarizə aparmaq və qurbanlara dəstək olmaq üçün Azərbaycanda bir sıra qurumlarla əməkdaşlıq edirik. Təlimin məqsədi insan alverinə qarşı mübarizə ilə bağlı maarifləndirmə və məlumatlandırma işinin artırılmasıdır. Eyni zamanda Azərbaycanda qəbul olunmuş milli fəaliyyət planlarına təkmilləşdirilməsinə dəstək göstərməkdir. Layihə müxtəlif qurumlar arasında əlaqələrin inkişafına və əməkdaşlığın genişlənməsində mühüm töhfə verəcək. Azərbaycan Vəkillər Kollegiyası vacib tərəfdaşlarımızdandır. Təlimdə iştirak edən hüquqşünaslar burada yeni məlumatlar əldə edəcəklər.

Azərbaycan Vəkillər Kollegiyasının sədri Anar Bağırov diqqətə çatdırıb ki, Vəkillər Kollegiyası son illər beynəlxalq təşkilatlarla fəal əməkdaşlığa çox böyük əhəmiyyət verir. Bu əməkdaşlıq müxtəlif formalarda - treninq, seminarlar, konfranslar şəklində həyata keçirilir. Son illər Vəkillər Kollegiyasına qəbul olunan yüzlərlə yeni üzvlərin peşə hazırlığının artırılması, biliklərə və vərdişlərə yiyələnməsi üçün lazımı şəraitin yaradılmasına çalışırıq. Bu mövzular arasında insan alverinə qarşı mübarizə məsələləri xüsusi əhəmiyyət kəsb edir. Ölkəmizdə 2005-ci ildə insan alverinə qarşı mübarizə ilə bağlı müvafiq qanun qəbul olunub. Qanuna əsasən, bu sahədə lazımı tədbirlərin sistemli şəkildə təşkili dövlət proqramları əsasında reallaşdırılmalıdır. Azərbaycan Vəkillər Kollegiyası ilə BMqT-nin Azərbaycandakı nümayəndəliyi arasında əməkdaşlıq nümunəvi xarakter daşıyır. Bu qurumun irəli sürdüyü təklifləri bundan sonra da dəstəkləyəcəyik.

İnsan alveri qurbanlarına dəymiş ziyanın ödənilməsi, onların hüquqlarının müdafiəsi, qurbanlara hüquqi yardım göstərilməsi, pozulmuş hüquqlarının bərpası məsələlərinə toxunan Anar Bağırov qeyd edib ki, 2020-ci ildə məhkəmələrdə hüquqi yardımı qəbul edən insan alveri qurbanlarının sayı 61, istintaq mərhələsində isə hüquqi yardım göstərilən insan alveri qurbanlarının sayı 70 nəfər olub. Bu ilin altı ayında 40 nəfər insan alveri qurbanına məhkəmələrdə hüquqi yardım göstərilib. Həmin müddətdə istintaq mərhələsində isə hüquqi yardım göstərilən insan alveri qurbanlarının sayı 32 nəfər olub. Azərbaycan Vəkillər Kollegiyasının sədri ümumi işə böyük fayda gətirən səmərəli əməkdaşlıq münasibətlərinə görə beynəlxalq tərəfdaşlara minnətdarlığının bildirib, təlimin iştirakçılarına uğurlar arzulayıb.

Tədbirdə BMqT-nin eksperti İzabela Hartman beynəlxalq hüquqi çərçivə, transmilli mütəşəkkil cinayətkarlığa dair BMT konvensiyası və protokolları ilə bağlı, eləcə də Vəkillər Kollegiyasının Hüquqi Yardım və Tədris Mərkəzinin əməkdaşı Gülşən Salmanova təqdimatlarla çıxış ediblər.

Hüquqşünasların, vəkillərin qatıldıqları təlimlərə sentyabrın 10-da yekun vurulacaq.

Tədbirdə insan alveri haqqında beynəlxalq anlayış, insan alveri alətləri, istismarın müxtəlif formaları və digər müxtəlif mövzularda müzakirələr aparılır.