Bakıda 3 rayonda, Gəncə, Mingəçevir və Bərdədəki dövlət məktəbəqədər təhsil müəssisələrində uşaqlara isti yeməklərin verilməsi ilə bağlı pilot layihənin icrasına başlanılıb. Bu prosesdə ketrinq şirkətləri ilə əməkdaşlıq aparılır.

AZƏRTAC xəbər verir ki, bunu Elm və Təhsil Nazirliyinin Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev bağçalarla bağlı maarifləndirmə istiqamətində media nümayəndələri üçün keçirilən seminarda deyib. Onun sözlərinə görə, ketrinq şirkəti qəbul edilən vahid standartlara uyğun, əvvəldən razılaşdırılmış menyu və qramajlarla yeməyi bişirir və bağçalara təqdim edir: “Artıq yeməklərlə bağlı şəffaflıq yaranır ki, heç bir müdaxilə yoxdur. Mingəçevir şəhərində müsbət nəticələr əldə edilib”.