Bakıda AMEA-nın və Türkiyənin Atatürk Kültür, Dil və Tarix Yüksək Qurumunun tərkibinə daxil olan Türk Dil Qurumunun təşkilatçılığı ilə keçirilən Beynəlxalq Oğuz Türkcəsi Konfransının iştirakçıları Fəxri xiyabanda Ümummilli Lider Heydər Əliyevin məzarını ziyarət ediblər.

AZƏRTAC xəbər verir ki, Türk dünyasının elmi ictimaiyyəti Ulu Öndərin xatirəsini anıb, məzarı üzərinə tər gül dəstələri qoyub.

Həmçinin Ümummilli Liderin ömür-gün yoldaşı, görkəmli oftalmoloq-alim, akademik Zərifə xanım Əliyevanın xatirəsi ehtiramla anılıb, məzarı üzərinə tər çiçəklər düzülüb.

Tanınmış dövlət xadimi Əziz Əliyevin və professor Tamerlan Əliyevin də xatirələri yad olunub, məzarları üstünə gül dəstələri düzülüb.

Qonaqlar, həmçinin Şəhidlər xiyabanı və “Türk şəhidliyi” abidəsini ziyarət ediblər. Şəhidlərin xatirəsi ehtiramla yad edilib, məzarları üzərinə tər qərənfillər düzülüb.