Dekabrın 8-də Elm və Təhsil Nazirliyinin dəstəyi ilə Bakı Ekspo Mərkəzində SAF 2023 – Beynəlxalq STEAM Azərbaycan Festivalının bağlanış mərasimi keçirilib.
×
Dekabrın 8-də Elm və Təhsil Nazirliyinin dəstəyi ilə Bakı Ekspo Mərkəzində SAF 2023 – Beynəlxalq STEAM Azərbaycan Festivalının bağlanış mərasimi keçirilib.
AZƏRTAC xəbər verir ki, əvvəlcə “STEAM Azərbaycan” layihəsinin rəhbəri İqrar Nəzərov hesabatla çıxış edib. Bildirilib ki, SAF 2023-də 27 komanda birinci, 73 komanda ikinci, 67 komanda üçüncü yerə layiq görülüb. Xüsusi nominasiyalar üzrə isə 101 komanda qalib olub.
Tədbirdə Beynəlxalq STEAM Azərbaycan Festivalına dair videoicmal nümayiş etdirilib. Daha sonra qalib komandalara mükafatlar təqdim edilib.
Çıxış edən Baş nazirin müavini Əli Əhmədov, gənclər və idman naziri Fərid Qayıbov, elm və təhsil naziri Emin Əmrullayev, Azərbaycan Milli Elmlər Akademiyasının prezidenti İsa Həbibbəyli Azərbaycanda gənclərin biliklərə, texnologiyaya yiyələnməsi üçün imkanlar yaradıldığını söyləyiblər. Bildiriblər ki, belə tədbirlər gənc nəslin bilik və bacarıqlarının formalaşası, həm də əlaqələr qurması baxımından əhəmiyyətlidir.
SAF 2023 dekabrın 4-dən 8-dək, ümumilikdə 14 yarış və 1 sərgi kateqoriyası üzrə keçirilib. Festivalın final mərhələsində 11 ölkəni təmsil edən 868 yerli, 159 xarici iştirakçı yarışıb. Festivala Türkiyə, Niderland, Çexiya, Bolqarıstan, Böyük Britaniya, Qazaxıstan, Norveç, Slovakiya, Türkmənistan və Özbəkistandan da iştirakçılar qatılıb.
