Bakıda keçirilən bədii gimnastika üzrə 27-ci Azərbaycan çempionatına yekun vurulub.

AZƏRTAC xəbər verir ki, son olaraq çempionatda böyüklər yaş qrupunda müxtəlif alətlər üzrə qaliblər bəlli olub.

Ölkə çempionatda halqa ilə yarışda Arzu Cəlilova qızıl medal qazanıb. “Tokio-2020” Yay Olimpiya Oyunlarının iştirakçısı Zöhrə Ağamirova gümüş, İlona Zeynalova bürünc medala sahib olublar.

Topla hərəkətlərdə Z.Ağamirova birinci, A.Cəlilova ikinci, İ.Zeynalova üçüncü pillədə qərarlaşıblar.

Gürzlər ilə yarışda Alina Gözəlova fəxri kürsünün ən yüksək pilləsinə qalxıb. Z.Ağamirova və A.Cəlilova ilk üçlükdə yer alıblar.

Lentlə hərəkətlərdə Z.Ağamirova birinci olub. Arzu Cəlilova yarışı ikinci, Kamilla Əliyeva isə üçüncü pillədə başa vurublar.

Çempionatda paytaxt üzrə “Ocaq Sport”, Bakı Gimnastika Məktəbi, Respublika Kompleks İdman Məktəbi, digər şəhər və bölgələr üzrə Xırdalanın “Zirvə” klubu, Sumqayıt, Gəncə və Mingəçevirdən ümumilikdə 40 idmançı birincilik uğrunda yarışıb.

Qeyd edək ki, ikiillik fasilədən sonra xüsusi karantin rejimi çərçivəsində yumşalma tədbirləri ilə əlaqədar olaraq tamaşaçılar Milli Gimnastika Arenasında yarışları izləmək imkanı əldə ediblər.