Bakı Dövlət Universitetində (BDU) Tələbə İnkişaf Mərkəzi açılıb.

AZƏRTAC xəbər verir ki, Mərkəzin açılışında BDU rəhbərliyi, Elm və Təhsil Nazirliyinin, Milli Məclisin deputatları, universitetin İctimai Nəzarət Şurasının nümayəndələri, professor-müəllim heyəti və tələbələr iştirak ediblər.

Mərasimdə çıxış edən rektor Elçin Babayev qeyd edib ki, bu gün 106 yaşını qeyd edən Bakı Dövlət Universitetinin inkişafında növbəti səhifə açılır: “BDU yeni tədris ilinə öz zəngin ənənələrini qoruyaraq, beynəlxalq reytinqlərdə daha da irəliləyərək başlayır. Öz keçmişinə xüsusi hörmətlə yanaşır və eyni zamanda, strateji inkişafına uyğun olaraq gələcəyə daha böyük planlarla addımlayır. Bu gün açılışı olan Tələbə İnkişaf Mərkəzi tələbələrin şəbəkələşməsinə, onların inkişafına, problemlərin müzakirəsinə və həllinə şərait yaradacaq. Mərkəz BDU tələbələrinin elm və təhsil sahəsində uğurlarını artırmaqla yanaşı, sosial həyatlarını daha yaxşı təşkil etmələrinə şərait yaradacaq”.

Rektor diqqətə çatdırıb ki, BDU-da infrastrukturun yenilənməsi istiqamətində çoxsaylı layihələr nəzərdə tutulur: “Qarşıdan gələn illərdə bunun şahidi olacağıq. Ərazimizdə artıq bir neçə belə məkan fəaliyyət göstərir. Onların siyahısında COP29 çərçivəsində açılmış “Ekoməkan”ı, “Tələbə məkanı”nı, “Ekoenerji məntəqəsi” və digərlərini qeyd etmək istərdim.

Vətənimiz Azərbaycan üçün kadr hazırlığı hər bir ali təhsil müəssisəsinin başlıca vəzifəsidir. Biz bu vəzifəni vicdanla və yüksək keyfiyyətlə yerinə yetirməklə gələcəyimizin inkişafına xüsusi töhfə vermiş oluruq”.