Bakı Dövlət Universiteti (BDU) və Çinin Anhui Universitetinin birgə təşkilatçılığı ilə BDU-da Konfutsi İnstitutunun fəaliyyətə başlamasının 15 illik yubileyi qeyd olunub.

AZƏRTAC xəbər verir ki, tədbiri açan rektor Elçin Babayev BDU-da Konfutsi İnstitutunun 2011-ci ilin aprel ayında xaricdə Çin dilinin tədrisi üzrə ixtisaslaşmış Hanban təşkilatının dəstəyi, Bakı Dövlət Universiteti və Anhui Universitetinin tərəfdaşlığı əsasında yaradıldığını söyləyib. Onun sözlərinə görə, institut ötən 15 il ərzində Azərbaycanda Çin dilinin təhsili və mədəni mübadilə sahəsində mühüm mərkəzə çevrilib: “Bu gün biz yalnız bir qurumun yubileyini deyil, həm də Azərbaycan və Çin arasında, eləcə də Bakı Dövlət Universiteti ilə Anhui Universiteti arasında dostluğun, əməkdaşlığın və qarşılıqlı anlaşmanın 15 illik uğurlu tarixini qeyd edirik. Bu müddət ərzində minlərlə tələbə, tədqiqatçı və vətəndaş institutun fəaliyyətində iştirak edib. Bu fəaliyyətlərə Çin dili kursları, HSK (Çin dili bilik səviyyəsi imtahanı) hazırlıq proqramları, müəllim hazırlığı, danışıq klubları, mədəni tədbirlər və akademik mübadilə proqramları daxildir”.

Rektor bildirib ki, Konfutsi İnstitutu bu gün Azərbaycan ilə Çin arasında mədəni körpü rolunu oynayır. İnstitut Azərbaycan gənclərinin Çin dili, tarixi və mədəniyyəti ilə yaxından tanış olmasına şərait yaratmaqla yanaşı, Azərbaycan mədəniyyətinin Çində tanıdılmasına da töhfə verir.

Elçin Babayev süni intellekt, bərpaolunan enerji, ətraf mühit tədqiqatları, rəqəmsal texnologiyalar, birgə elmi layihələr və akademik mobillik istiqamətlərində əməkdaşlığın genişləndirilməsi üçün böyük potensialın mövcud olduğunu bildirib: “Əminəm ki, qarşıdakı on beş il daha böyük uğurlar və yeni nailiyyətlərlə yadda qalacaq. Konfutsi İnstitutu bundan sonra da dialoqun, qarşılıqlı anlaşmanın və akademik mükəmməlliyin təşviqinə xidmət edəcək. Konfutsi fəlsəfəsinin ruhuna uyğun olaraq vurğulamaq istəyirəm ki, təhsil anlaşma, anlaşma isə harmoniya yaradır. Məhz bu prinsip son 15 il ərzində əməkdaşlığımıza rəhbərlik edib və gələcəkdə də yol göstəricimiz olacaq”.

Tədbirdə Çinin Azərbaycandakı səfirliyinin müşaviri Dinq Tao BDU ilə Konfutsi İnstitutu arasında əməkdaşlığın uğurla davam etdiyini vurğulayaraq bildirib ki, iki ölkə arasında münasibətlər son illərdə yeni inkişaf mərhələsinə qədəm qoyub. Təhsil, elm, texnologiya, innovasiya və mədəni mübadilə sahələrində əlaqələr dinamik şəkildə genişlənir, qarşılıqlı faydalı əməkdaşlıq yeni layihələrlə zənginləşir. Müşavir universitetlərarası əməkdaşlığın, tələbə-müəllim mübadiləsinin və birgə elmi tədqiqatların gələcəkdə daha da inkişaf etdiriləcəyinə əminliyini ifadə edib.

Daha sonra Anhui Universitetinin vitse-prezidenti Huanq Çısyan tədbirdə çıxış edib. O bildirib ki, iki ölkənin ali təhsil müəssisələri arasında tərəfdaşlıq tələbə və müəllim mübadiləsinin genişlənməsinə, elmi əlaqələrin möhkəmlənməsinə və yeni birgə təşəbbüslərin reallaşmasına şərait yaradır.

Tədbirdə Çin Beynəlxalq Təhsil Fondunun baş katibi Zhao Lingshanın videomüraciəti nümayiş olunub. O, beynəlxalq təhsil əməkdaşlığının əhəmiyyətini vurğulayaraq, Azərbaycan və Çin arasında təhsil sahəsində əlaqələrin inkişafından məmnunluğunu ifadə edib.

Mərasim bədii hissə ilə davam edib. Proqram çərçivəsində Azərbaycan və Çin dillərində mahnılar səsləndirilib, xor və solo ifalar təqdim olunub, Çin ənənəvi fan, qılınc, qrup və bambuk rəqsləri nümayiş etdirilib. Həmçinin müxtəlif püşkatmalar keçirilib, qaliblərə hədiyyələr təqdim olunub. Sonda isə Konfutsi İnstitutunun fəaliyyətinin 15 illiyinə həsr edilmiş videoçarx nümayiş olunub.