Mayın 21-də Bakı Dövlət Universitetinin Konfutsi Mərkəzi və Çin Xalq Respublikasının ölkəmizdəki səfirliyinin birgə təşkilatçılığı ilə XXIV “Çin dili körpüsü” beynəlxalq müsabiqəsinin Azərbaycan final mərhələsi keçirilib.

AZƏRTAC xəbər verir ki, tədbirdə BDU-nun rektoru Elçin Babayev və Çin Xalq Respublikasının Azərbaycan Respublikasındakı səfiri Lu Mey açılış nitqi ilə çıxış ediblər.

Rektor Elçin Babayev çıxışında Azərbaycan-Çin əlaqələrinin strateji tərəfdaşlıq xarakteri daşıdığını vurğulayıb. O, Azərbaycan ilə Çin arasında əməkdaşlığın siyasi, iqtisadi-ticari, nəqliyyat, enerji, sənaye, sərmayələr, təhlükəsizlik, mədəni-humanitar və digər sahələri əhatə etdiyini qeyd edib.

Azərbaycan Respublikasının Prezidenti İlham Əliyevin Çinə səfərinin təfərrüatları ilə bölüşən Elçin Babayev bildirib ki, ölkə rəhbərinin Çində “Vətən” musiqi kompozisiyası ilə qarşılanması xalqımıza böyük qürur hissi yaşadıb. Çin-Azərbaycan əlaqələrinin qədim tarixə əsaslandığını diqqətə çatdıran E.Babayev bu istiqamətdə BDU-nun fəaliyyəti barədə məlumat verib.

Səfir Lu Mey bildirib ki, Çinin Azərbaycandakı səfiri kimi vəzifəyə başladıqdan sonra ilk tədbirində - “Çin dili körpüsü” Çin dili müsabiqəsində iştirak edir: “İlk növbədə, XXIV “Çin dili körpüsü” beynəlxalq müsabiqəsinin Azərbaycan final mərhələsinin təşkilində əməyi keçən hər kəsə təşəkkür edirəm. Həmçinin uzun illərdir ki, Çin dili tədrisini dəstəkləyən, Çin-Azərbaycan dostluğuna töhfə verən hər kəsə dərin hörmətimi bildirirəm.

Azərbaycan Respublikasının Prezidenti İlham Əliyev Çinə dövlət səfəri etdi və dövlət başçıları Çin-Azərbaycan arasında hərtərəfli strateji əməkdaşlıq münasibətlərinin qurulduğunu birgə bəyan etdilər. Bu, iki ölkə arasında əməkdaşlığın dərinləşməsi və mədəni-humanitar mübadilələrin genişlənməsi üçün yeni imkanlar açır.

Dövlətlərarası münasibətlərin əsasını xalqların dostluğu təşkil edir. Çin-Azərbaycan münasibətlərinin davamlı inkişafı hər iki ölkənin gənclərinin fəal iştirakı və dəstəyi olmadan mümkün deyildi. Bu gün daha çox Azərbaycan gənci Çin dilini öyrənir, Çin mədəniyyətini tanıyır və Çinə dərin maraq göstərir. Bu fürsətdən istifadə edərək azərbaycanlı dostlara arzum budur ki, bu imkanlardan maksimum istifadə edərək Çin dili biliklərini daim təkmilləşdirsinlər və hər birimiz öz sahəmizdə Çin-Azərbaycan hərtərəfli strateji tərəfdaşlığın möhkəmlənməsinə töhfə verək.

Tədbirdə, həmçinin BDU-nun Şərqşünaslıq fakültəsinin dekanı Aydan Xəndan, Beynəlxalq əlaqələr şöbəsinin müdiri Rauf Həsənov, BDU-da fəaliyyət göstərən Konfutsi mərkəzinin direktoru Vanq Haoqianq iştirak ediblər.

“Çin dili körpüsü” beynəlxalq müsabiqəsinin Azərbaycan mərhələsində finala on iştirakçı yüksəlib. Müsabiqədə ölkənin müxtəlif təhsil ocaqlarından Çin dilini öyrənən tələbələr iştirak ediblər. İştirakçılar dil bilikləri ilə yanaşı, rəqs, rəsm, mahnı və aktyorluq kimi istedadlarını nümayiş etdiriblər.

Tədbirdə Bakı Dövlət Universiteti və Çinin Anhui Universitetinin tarixini və fəaliyyətini əks etdirən videoçarx nümayiş olunub.

BDU-nun Şərqşünaslıq fakültəsinin tələbələri Ömər Məmmədov müsabiqədə I, Sevda Məcidli II, Darya Yefimova, Səma Xudiyeva, Azərbaycan Dillər Universitetinin tələbəsi Fatimə Əliyeva III yeri tutub. I yerin qalibi Ömər Məmmədov Azərbaycanı müsabiqənin Çində keçiriləcək final mərhələsində təmsil edəcək.