Dekabrın 15-də Bakı Dövlət Universiteti, Rusiya Federasiyasının Birləşmiş Nüvə Tədqiqatları İnstitutu STAR-NET Nüvə Texnologiyaları üzrə Regional Təhsil və Təlim Şəbəkəsi, Macarıstanın Szeged Universiteti və Romanın La Sapienza Universitetinin birgə təşkilatçılığı ilə “Fizikada müasir trendlər” mövzusunda VII beynəlxalq konfrans öz işinə başlayıb.

AZƏRTAC xəbər verir ki, konfransın plenar iclasını BDU-nun rektoru Elçin Babayev açaraq onun işinə uğurlar arzulayıb. Rektor bildirib ki, konfransın keçirilməsində məqsəd fizika və əlaqəli elm sahələrində yeni prioritet istiqamətləri aşkara çıxarmaq, innovativ və tətbiqi xarakterli istiqamətləri müəyyənləşdirmək, beynəlxalq səviyyəli mütəxəssislərlə təcrübə mübadiləsi aparmaq, gənc tədqiqatçıları elmi araşdırmalara təşviq etmək, elmi tədqiqatların nəzəri və tətbiqi cəhətdən əldə olunan mühüm nəticələrini beynəlxalq səviyyədə müzakirə etməkdən ibarətdir.

Dekabrın 17-dək davam edəcək tədbirdə Azərbaycanla yanaşı, Türkiyə, Rusiya, İtaliya, Macarıstan, ABŞ, Pakistan, Özbəkistan, Ukrayna, Çin, Gürcüstan və Belçikadan olan tanınmış alimlər məruzə edəcəklər. Konfransın materialları “Web of Science” bazasına daxil ediləcək. Məruzəçilər sırasında Azərbaycan Milli Elmlər Akademiyasının əməkdaşları da olacaq. Konfransda nəzəri və yüksək enerjilər fizikası, biofizika, kodensə olunmuş hal fizikası, materialşünaslıq və maddə mühəndisliyi, kosmos elmləri və astrofizika istiqamətləri üzrə məruzələr dinləniləcək.