Yanvarın 29-da Milli Gimnastika Arenasında keçirilən batut gimnastikası üzrə 6-cı, tamblinq üzrə 18-ci Azərbaycan birinciliyinin və Bakı çempionatının qaliblərinin mükafatlandırılması mərasimi keçirilib.

AZƏRTAC xəbər verir ki, batut gimnastikası yarışının balacalar yaş qrupunda qadınlar arasında Ayla Məmmədova 34,150 xalla birinci, Nigar Hüseynova 33,150 xalla ikinci yeri tutublar. Hər iki idmançı “Ocaq” idman klubunu təmsil edir.

Tamblinq yarışında uşaqlar yaş qrupunda kişilər arasında Sənan Rzazadə 39,500 xalla birinci, Xəzər İsmayılov 38,900 xalla ikinci, İhsan Mehrəliyev 38,100 xalla üçüncü yerdə qərarlaşıblar. İdmançılar Bakı Gimnastika Məktəbini təmsil edir.

Tamblinq üzrə uşaqlar yaş qrupunda isə qadınların mübarizəsində Aylin Şərifzadə 38,000 xalla birinci olub. O, Bakı Gimnastika Məktəbinin yetirməsidir. Bu məktəbin daha bir yetirməsi İlham Məsimov tamblinq üzrə yeniyetmələr yaş qrupunda kişilər arasında 38,600 xal nəticə göstərib.

Qeyd edək ki, batut gimnastikası üzrə 6-cı, tamblinq üzrə 18-ci Azərbaycan birinciliyi və Bakı çempionatından sonrakı ilk üç ay ərzində Milli Gimnastika Arenasında gimnastikanın müxtəlif növləri üzrə daha üç yerli yarış keçiriləcək.