Nəsildən-nəslə keçərək inkişaf edən Basqal kəlağayısı AZƏRTAC-ın fotoobyektivində
İsmayıllı, 25 avqust, AZƏRTAC
 İsmayıllı rayonunun mərkəzindən 56 kilometr məsafədə yerləşən Basqal kəndi hazırda dövlət mədəni-tarix qoruğudur. Bu kəndə şöhrət qazandıran əsas amillərdən biri də burada hazırlanan və dünyada tanınan milli ipək kəlağayılardır.
Yaxın keçmişə qədər Basqalda hər evdə ipəkəyirən qədim dəzgahlar olub. Boyaçılıq, toxuculuq, ipəkçilik nəsildən-nəslə keçərək inkişaf edib. 
Azərbaycan xalq yaradıcılığının gözəl nümunəsi sayılan kəlağayı sosial statusundan asılı olmayaraq qadın geyiminin əsas atributlarından olub. Kəlağayı müxtəlif rəng və ölçülərdə olur, adətən yeləni (haşiyəsi), bəzən isə xonçası (ortası) basmanaxış üsulu ilə həndəsi və ya nəbati naxışlarla bəzədilir. Adətən toy zamanı gəlinin başına qırmızı kəlağayı örtər, yasda hər kəs qara kəlağayıya bürünərdi. Adi vaxtlarda açıq qəhvəyi və ya bəyaz rənglərində kəlağayılar bağlanardı. 
Altı-yeddi rəng çalarında olan kəlağayıların qiyməti daha baha olub. Basqalda indi məhz bu cür kəlağayılar hazırlanır.
AZƏRTAC fotoqraf Roman İsmayılovun Basqalda məşhur kəlağayı ustası Mürşüd Talıbovun əl işlərindən ibarət fotoreportajını təqdim edir.