Ölkəmizdə həyata keçirilən islahatlar çərçivəsində prokurorluq orqanlarının cəmiyyətdə formalaşan yeni çağırışlara uyğunlaşdırılması, o cümlədən prokurorluq orqanlarının fəaliyyəti ilə bağlı aşkarlığın, hesabatlılığın və şəffaflığın təmin olunması məqsədilə mühüm tədbirlər davam etdirilir.

AZƏRTAC xəbər verir ki, bu tədbirlərin davamı kimi, prokurorluq orqanları ilə kütləvi informasiya vasitələri arasında işgüzar əlaqələrin möhkəmləndirilməsini, fəaliyyət istiqamətləri üzrə keyfiyyət və səmərəliliyin daha da artırılmasını, habelə məlumat mübadiləsi zamanı mövcud qanunvericiliyin tələblərinə əməl olunmasını təmin etmək məqsədilə Azərbaycan Respublikasının Baş Prokurorluğunun və Medianın İnkişafı Agentliyinin (MEDİA) birgə təşkilatçılığı ilə oktyabrın 13-də Baş Prokurorluğun inzibati binasında “Media və hüquqi maarifləndirmə” mövzusunda tədbir keçirilir.

Əvvəlcə Azərbaycanın müstəqilliyi və ərazi bütövlüyü uğrunda şəhid olmuş qəhrəman Vətən övladlarının əziz xatirəsi bir dəqiqəlik sükutla yad edilib.

Baş prokurorun müavini Heydər Məmmədov tədbiri açıq elan edərək qonaqları salamlayıb.

Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə doğma torpaqlarımızın 44 gün ərzində yenilməz Ordumuz tərəfindən azad olunmasından söz açan Baş prokurorun müavini qısa müddətdə həmin bölgələrdə həyata keçirilən infrastrukturun bərpası ilə bağlı quruculuq işlərinin sürətlə davam etdirildiyini, Birinci və İkinci Qarabağ müharibələri şəhidlərinin ailələrinə, qazilərə və veteranlara xüsusi dövlət qayğısının göstərildiyini vurğulayıb. Heydər Məmmədov prokurorluq orqanlarında həyata keçirilən müasir məzmunlu islahatlar barədə məlumat verib.

Prokurorluq orqanları və kütləvi informasiya vasitələri arasında mövcud işgüzar əlaqələrdən bəhs edən Heydər Məmmədov media ilə kommunikasiyanın gücləndirilməsinin zəruriliyini vurğulayıb, zamanın tələbinə uyğun olaraq prokurorluq orqanlarının sosial media fəaliyyətinin möhkəmləndirilməsi istiqamətində mühüm addımların atıldığını, vətəndaş məmnunluğunun təmin olunması məqsədilə qurumun fəaliyyəti ilə bağlı aşkarlıq və hesabatlılığın ictimaiyyətə operativ şəkildə çatdırılmasının əhəmiyyətli olduğunu tədbir iştirakçılarının diqqətinə çatdırıb. O, Baş Prokurorluğun və MEDİA-nın ilk birgə layihəsi olan “Media və hüquqi maarifləndirmə” vəsaitinin hazırlandığını bildirib.

Medianın İnkişafı Agentliyinin İcraçı direktoru Əhməd İsmayılov Baş Prokurorluq və MEDİA arasında mövcud olan sıx əməkdaşlıqdan məmnunluğunu bildirərək, prokurorluq əməkdaşlarının iştirakı ilə gələcəkdə də dəyirmi masa və görüşlərin təşkilinin əhəmiyyətini qeyd edib.

Media sahəsində keyfiyyət dəyişikliklərinə ehtiyac olduğunu bildirən Əhməd İsmayılov dövlət qurumları ilə kütləvi informasiya vasitələri arasında kommunikasiyanın modern tələblər səviyyəsinə çatdırılması, media nümayəndələrinin peşəkarlığının artırılması, sahəvi jurnalistikanın inkişafı ilə bağlı kompleks tədbirlərin görüldüyünü, prokurorluq orqanlarının bu işdə fəal iştirak etdiyini diqqətə çatdırıb. İcraçı direktor “Media və hüquqi maarifləndirmə” vəsaitinin məhz sahəvi jurnalistikanın inkişafı və media nümayəndələrinin peşəkarlığının artırılması baxımından önəmini vurğulayıb.

Tədbirdə Baş Prokurorluğun mətbuat xidmətinin rəhbəri Günay Səlimzadə “Prokurorluq orqanları ilə kütləvi informasiya vasitələri arasında mövcud münasibətlər və perspektivlər” mövzusunda çıxış edib.

Sonra Baş Prokurorluğun mətbuat xidmətinin böyük prokuroru Kənan Zeynalov tərəfindən “Media və hüquqi maarifləndirmə” vəsaitinin təqdimatı olub.

Medianın İnkişafı Agentliyinin Hüquq və insan resurslarının idarə edilməsi departamentinin direktoru Rəqsanə Kərimova “İstintaq prosesinin mediada obyektiv işıqlandırılması və balanslı təqdimatı” mövzusunda çıxış edib.

Çıxışlardan sonra prokurorluq orqanları ilə media arasında operativ və səmərəli kommunikasiyanın qurulması barədə fikir mübadiləsi aparılıb. Müzakirələrdə iştirakçılar tərəfindən mühüm təkliflər səsləndirilib, bu məzmunlu tədbirlərin informasiya mübadiləsi prosesində mühüm irəliləyişlərə səbəb olacağı qeyd edilib.