Noyabrın 5-də Beynəlxalq Avrasiya Mətbuat Fondu (BAMF) Ermənistan işğalçı hərbi qüvvələrinin Azərbaycana qarşı törətdiyi cinayətlərə dair hesabatını təqdim edib.

AZƏRTAC xəbər verir ki, hesabat Ermənistan hərbi qüvvələrinin Qarabağ cəbhəsində təxribatçı əməlləri nəticəsində baş verən eskalasiyanın sentyabr və oktyabr ayları üzrə yekunlarına həsr edilib. Hesabat BAMF müşahidә missiyasının üzvlәri - qurumun prezidenti Umud Mirzәyev, vitse-prezident Ramil Әzizov, təşkilatın Amerika təmsilçisi, beynəlxalq münasibətlər üzrə ekspert Piter Teys, təşkilatın BMT-nin Cenevrə ofisində, BMT İnsan Haqları üzrə Komitəsində daimi nümayəndəsi, hüquq elmləri üzrə professor Osman Әl Həcc tərəfindən hazırlanıb.

Hesabatda erməni hərbi birləşmələrinin Azərbaycanın mülki şəxslərinə, strateji obyektlərə, sosial infrastruktura qarşı hərbi təcavüzünün nəticələrinə dair qiymətləndirmələr əksini tapıb. Hesabat sentyabrın 27-dən başlayan hərbi əməliyyatlar zamanı Ermənistan hərbi birləşmələri tərəfindən təmas xəttindən uzaqda yerləşən Azərbaycan şəhərlərinin və kəndlərinin atəşə tutulması ilə törədilən müharibə cinayətlərindən bəhs edir.

Hesabat BAMF-ın müşahidə missiyasının İkinci Qarabağ müharibəsi zamanı erməni hərbi birləşmələrinin beynəlxalq hüquq normalarına zidd əməllərinin təsbit olunması baxımından fərqli bir yanaşmadır. Belə ki, hesabatın hazırlanması zamanı müharibədən zərər çəkmiş və döyüşlərdə iştirak etmiş şəxslərin, onların ailə üzvlərinin, vətəndaş cəmiyyəti institutlarının, hərbi mükəlləfiyyətlilərin, eləcə də beynəlxalq qurumların, media təmsilçilərinin rəylərinə, müxtəlif araşdırmalara və əyani müşahidələrə istinad edilib. Hesabatda erməni hərbi birləşmələrinin Gəncə, Bərdə, Mingəçevir, Tərtər, Ağdam, Füzuli, Ağcabədi, Goranboy şəhərlərinə raket hücumları ilə törədilmiş müharibə cinayətlərin hüquqi qiymətləndirilməsi haqqında geniş təhlil aparılıb. Ermənistana qanunsuz silah daşınması, muzdluların hərbi əməliyyatlarda iştirakı, beynəlxalq konvensiyalara zidd olaraq mülki şəxslərə qarşı qadağan edilmiş silah və sursatlardan istifadə, mülki obyektlərin dağıdılması, Azərbaycanın iri sənaye şəhərlərinin ballistik raketlərlə atəşə tutulmasının nəticələri hesabatda dəqiqliklə əks olunub.

Hesabat uzun illərdir müharibədən zərər çəkmiş və təmas xəttinə yaxın ərazilərdə fəaliyyət göstərən, sosial humanitar proqramlar yerinə yetirən vətəndaş cəmiyyəti qurumunun müstəqil müşahidələrinin və araşdırmalarının nəticəsidir. Hesabat BMT-nin baş katibi Antonio Quterreşə, BMT İnsan Haqları Ofisinin rəhbəri Mişel Baçelota, ATƏT-ə, Avropa Şurasına, Beynəlxalq Böhran Qrupunun sədri Anna Neiştada və Qrupun vəkillik və kampaniya üzrə meneceri Eleanor Kennediyə, BMT-nin Azərbaycandakı rezident əlaqələndiricisi Qulam İsakzaiyə, eləcə də müxtəlif beynəlxalq qurumlara göndərilib.

Hesabatın BMT agentlikləri və Avropa Şurasının parlament üzvləri arasında geniş yayılması nəzərdə tutulub.