Noyabrın 17-də Yaponiyanın ölkəmizdəki səfirliyi və “ABAD” publik hüquqi şəxsin birgə təşkilatçılığı ilə yapon sənətçi Takahaşi Maminin təqdimatında ənənəvi yapon incəsənət növləri olan “Kintsugi” və “Mokuhanqa” sənətləri nümayiş olunub.

AZƏRTAC xəbər verir ki, tədbirdə çıxış edən “ABAD” publik hüquqi şəxsin direktoru Rüfət Elçiyev insan əl əməyinin, ruhunun, duyğularının və zövqünün ifadəsi olan yaradıcı sənayelərə tarix boyu ehtiyac olduğunu və gələcəkdə də olacağını bildirib. Qeyd edib ki, bu baxımdan yaradıcı sənayelərin ayrılmaz tərkib hissəsi olan əl işi sənətkarlığına marağın artırılması “ABAD”ın başlıca məqsədlərindəndir.

“ABAD”ın Azərbaycan sənətkarlıq irsinin ölkəmizin hüdudlarından kənarda təbliğinə, eyni zamanda, digər xalqların sənətkarlıq irsinin Azərbaycanda tanıdılmasına böyük əhəmiyyət verdiyini deyən R.Elçiyev diqqətə çatdırıb ki, məhz bugünkü tədbirin əsas məqsədi də iki xalq arasında olan mədəni əlaqələrin gücləndirilməsidir.

Yaponiyanın ölkəmizdəki səfiri Cuniçi Vada Yaponiyanın ənənəvi sənətləri olan “Kintsugi” və “Mokuhanqa”nın təqdim edildiyi tədbirin Azərbaycanla Yaponiya arasında dostluq əlaqələrinin inkişafına vəsilə olacağını qeyd edib.

“Takahaşi Maminin maraqlı və məşhur təqdimatı iştirakçıların yapon mədəniyyəti ilə daha yaxından tanış olmasına imkan yaradacaq. Həmçinin ümid edirəm ki, Yaponiya incəsənətinə marağınız artacaq”, - deyə C.Vada vurğulayıb.

Daha sonra Takahaşi Mami “Kintsugi” və “Mokuhanqa” sənətləri üzrə təqdimat edib. O, yapon sənətlərinin tarixi və fəlsəfəsi haqqında geniş məlumat verib. Qeyd edilib ki, “Kintsugi” qırılmış əşyaların, keramika qablarının qızıl tozundan istifadə edərək birləşdirilməsi və əvvəlkindən daha gözəl hala gətirilməsi sənətidir. Bu sənət növü qüsurların mükəmməlliyini kəşf etmək, qırılmanın əslində bir son deyil, yeni həyata bir başlanğıc ola biləcəyini göstərir. “Mokuhanqa” isə su əsaslı xüsusi boyalardan istifadə olunan ksiloqrafiya sənətidir. Bu, eyni zamanda, məşhur yapon qravür sənəti “Ukiyo”nun da əsasında duran incəsənət növüdür. Qərb dünyasında istifadə olunan taxta blok çapından fərqli olaraq yağlı boyalardan deyil, məhz su əsaslı təbii boyalardan istifadə olunur və çoxsaylı rəng seçimi var.

Tədbir sual-cavab sessiyasi ilə yekunlaşıb.

Qeyd edək ki, Yaponiya və ABŞ-da uzun illərdir müasir və ənənəvi sənət növləri üzrə məşğul olan Takahaşi Maminin müxtəlif ölkələrdə sərgiləri təşkil olunur. Takahaşi Mami ilkin olaraq təhsilini Tokioda Qızlar İncəsənət Universitetində aldıqdan sonra magistr dərəcəsini ABŞ-ın Portland Dövlət Universitetində davam etdirib.