Bakıda Birinci Türkoloji Qurultayın 100 illiyinə həsr olunmuş “Türk Dünyası Həftəsi” çərçivəsində Dənizkənarı Milli Parkda möhtəşəm konsert proqramı təqdim olunub.
×
Bakıda Birinci Türkoloji Qurultayın 100 illiyinə həsr olunmuş “Türk Dünyası Həftəsi” çərçivəsində Dənizkənarı Milli Parkda möhtəşəm konsert proqramı təqdim olunub.
AZƏRTAC xəbər verir ki, konsert Azərbaycan Dövlət Rəqs Ansamblının ifasında təqdim olunan “Uzundərə” xalq rəqsi ilə başlayıb.
Daha sonra Qazaxıstan, Qırğızıstan, Özbəkistan və Türkiyədən gələn rəqs kollektivləri öz ölkələrinin zəngin folklor irsini, milli musiqisini və rəqs ənənələrini əks etdirən rəngarəng çıxışlarla tamaşaçıların qarşısında çıxış ediblər.
Konsertdə, həmçinin Azərbaycanın və Türk dünyasının tanınmış ifaçıları müxtəlif dillərdə səsləndirilən mahnılarla çıxış edərək türk xalqlarının zəngin musiqi irsini, ortaq mədəni dəyərlərini və qardaşlıq ruhunu tərənnüm ediblər.
Konsert proqramı boyunca səslənən musiqi nömrələri və nümayiş etdirilən rəqslər tamaşaçılara Türk dünyasının zəngin mədəni müxtəlifliyini, ortaq mənəvi dəyərlərini və mədəni birliyini bir daha nümayiş etdirib.
