Noyabrın 23-də Bakıda Olimpiya və Paralimpiya Cüdo Klubunun açılış mərasimi keçirilib.

AZƏRTAC xəbər verir ki, tədbirdə Azərbaycan Milli Paralimpiya Komitəsinin (AMPK) prezidenti İlqar Rəhimov, qurumun vitse-prezidenti, ikiqat Paralimpiya çempionu İlham Zəkiyev, Azərbaycan Cüdo Federasiyasının vitse-prezidenti, Olimpiya çempionu Elnur Məmmədli və digər şəxslər iştirak ediblər.

Açılış mərasimi Azərbaycan Respublikasının Dövlət Himninin səsləndirilməsi ilə başlayıb.

Mərasimdə çıxış edənlər idman zalının ərsəyə gəlməsində “London-2012” Yay Paralimpiya Oyunlarının qalibi, hazırda paracüdoçu qadınlardan ibarət Azərbaycan milli komandasında baş məşqçi vəzifəsində çalışan Ramin İbrahimovun əməyini xüsusi vurğulayıblar.

AMPK-nın prezidenti İlqar Rəhimov açılış mərasimində çıxış edərək Azərbaycanda həm cüdo, həm də para-cüdonun inkişafından danışıb, bu istiqamətdə ardıcıl tədbirlərin davam etdirildiyini vurğulayıb. İstər cüdo, istər paracüdo üzrə atletlərimizin ölkəmizi beynəlxalq arenalarda layiqincə təmsil etdiklərini vurğulayan İ.Rəhimov paracüdoçularımızın Tokioda yüksək səviyyədə iştirak edərək Azərbaycanın Dövlət Himnini dəfələrlə səsləndirdiklərini və bayrağını yüksəklərdə dalğalandırdıqlarını bildirib: “Ramin İbrahimovun rəhbərliyi altında qızlarımızın “Tokio-2020”də 4 qızıl medal qazandıqlarını xüsusi qeyd etmək istəyirəm. Bu, böyük uğurdur və bu nailiyyətin əldə olunmasında Ramin İbrahimovun gərgin zəhməti var. O, həm baş məşqçi kimi fəaliyyətini davam etdirir, həm də Azərbaycanda müasir idman qurğularının, zallarının açılması işində səylə çalışır. İdman zallarının açılması o deməkdir ki, həm cüdo, həm də paracüdo ölkəmizdə inkişaf edir. Həm paracüdoçular, həm cüdoçular burada məşq edərək ustalıqlarını artıracaqlar”.

İ.Rəhimov daim AMPK-ya göstərdiyi dəstəyə və səmərəli əməkdaşlığa görə Azərbaycan Cüdo Federasiyasının rəhbərliyinə təşəkkür edib. Bildirib ki, cüdoçuların hazırlığında, beynəlxalq turnirlərin keçirilməsində, eləcə də bu zalın açılmasında federasiyanın dəstəyini xüsusi vurğulayıb.

AMPK-nın vitse-prezidenti, ikiqat Paralimpiya çempionu İlham Zəkiyev bu cüdo zalının açılışının Azərbaycanda idmanın inkişafına göstərilən diqqət və qayğının göstəricisi olduğunu vurğulayıb: “Azərbaycanda idmanın maddi-texniki bazasının gücləndirilməsi ölkəmizdə bu sahənin inkişafına göstərilən diqqət və qayğının nümunəsidir. Zalın açılışında zəhməti olan hər kəsə təşəkkürümü bildirmək istəyirəm. Əminəm ki, bu zalda gələcəyin Avropa, dünya və Olimpiya çempionları yetişəcəklər”.

Cüdo üzrə Olimpiya çempionu Elnur Məmmədli çıxışında müasir standartlara cavab verən cüdo zalının açılmasının bu idman növünün inkişafına təkan verəcəyini bildirib: “Son illər idmanın maddi-texniki bazasının gücləndirilməsi istiqamətində ardıcıl işlər görülür. Bu gün istifadəyə verilən bu zalda cüdoçuların məşq etmələri üçün hər cür şərait yaradılıb. Əminik ki, bu zalda yetişəcək cüdoçular Azərbaycanı beynəlxalq arenalarda layiqincə təmsil edəcəklər”.

“Neftçi” idman klubunun meneceri Elmar Babanlı ölkəmizdə cüdonun inkişafı istiqamətində genişmiqyaslı tədbirlərin həyata keçirildiyini, bu idman növünün kütləviliyinin artırılması üçün yeni zalların və qurğuların istifadəyə verildiyini bildirib. Yeni zalın açılışı münasibətilə “Neftçi” idman klubunun rəhbərliyi adından cüdo və idman ictimaiyyətini təbrik edən E.Babanlı bu uğurların davamlı olacağına əminliyini bildirib: “Cüdo Azərbaycanda həmişə populyar olub. Ötən illərdə həm paracüdo, həm də cüdo üzrə yarışlarda ölkəmizdə böyük nailiyyətlər əldə edilib. Əminik ki, bu uğurlar davamlı olacaq”.

Sonra tədbir iştirakçıları idman qurğusunda yaradılan şəraitlə tanış olublar.

Məlumat verilib ki, Bakı Olimpiya və Paralimpiya Cüdo Klubunda paralimpiyaçılarla yanaşı, olimpiyaçılar, fiziki məhdudiyyətli gənclər və uşaqlar da məşq edə biləcəklər.