Oktyabrın 24-də Bakıda Milli Kulinariya Konqresinin açılış mərasimi keçirilib.

AZƏRTAC xəbər verir ki, konqresin keçirilməsinin əsas məqsədi milli kulinariyanın və qastroturizmin inkişafına dəstək olmaq, yerli istehsalçılar və fermerlər arasında əməkdaşlıq əlaqələrini genişləndirmək üçün platforma yaratmaq, həmçinin yerli tərəvəzlərdən istifadə ideyasını təbliğ etməkdir.

Konqresdə Dövlət Turizm Agentliyinin sədri Fuad Nağıyev ölkə rəhbərliyi tərəfindən turizmin inkişafına xüsusi diqqət ayrıldığını bildirib. O deyib: “Ölkəyə gələn xarici turistlərə təqdim etməyə çoxçeşidli turizm məhsullarımız var. Azərbaycanın “qastronomiya ölkəsi” kimi tanınması üçün böyük potensiala malikdir. Təbiətimiz zəngindir. Əlverişli iqlim şəraiti, məhsuldar torpaqlarımız təbii məhsulların həm çeşidinə, həm dadına öz təsirini göstərir. Qastronomiya turizminin inkişafı yalnız milli mətbəximizi deyil, həmçinin zəngin maddi-mədəni irsimizi, tarixi ənənələrimizi, mədəniyyətimizi də dünyaya tanıtmağa kömək edir. Ölkəmizin təmsil olunduğu bütün beynəlxalq tədbirlərdə milli kulinariyamız, bu sahədə olan turizm potensialı çox geniş şəkildə beynəlxalq ictimaiyyətə təqdim olunur və maraq doğurur”, - deyə o qeyd edib.

Bu ilin mayında Heydər Əliyev Fondu və Agentliyin təşkilatçılığı ilə Şuşada I Beynəlxalq Kulinariya Festivalının keçirildiyini xatırladan F.Nağıyev Ali Baş Komandanın rəhbərliyi ilə igid əsgərlərimizin qəhrəmancasına azad etdiyi Qarabağın incisi olan Şuşada belə bir festivalın təşkilini mühüm hadisə kimi dəyərləndirib: “Festivalda 11 ölkədən, Azərbaycanın 14 bölgəsindən olan kulinariya nümunələri nümayiş etdirildi. Qastronomiya turizmi həm regional turizm, həm də aqro və eko turizm növləri ilə ahəngdar olaraq inkişaf edir. Bu baxımdan Agentliyin dəstək verdiyi layihələrdən biri “Azərbaycanda Böyük Qafqaz Dağları Ərazisində İcma Əsaslı Dəyər Zəncirinin Genişləndirilməsi” - “Slow Food” pilot layihəsini qeyd etmək olar. Layihə Şamaxı, İsmayıllı, Qəbələ, Şəki və Qaxı əhatə etdi. Gələcəkdə digər turizm dəhlizləri üzrə də bu növ marşrutların yaradılması planlaşdırıla bilər. Regionların unudulmuş, qədim yeməklərini üzə çıxartmaq, biomüxtəlifliyini qorumaq və yerli qastronomiyanın tanınmasına nail olmaq baxımından bu kimi layihələr önəm kəsb edir. Həmçinin qastronomiya turizmi ölkəmiz üçün çox vacib iki sahəni - turizm və kənd təsərrüfatını birləşdirdiyi üçün regionlarda kiçik sahibkarlığın və ailə biznesinin dəstəklənməsinə, nəticə etibarilə yerli əhalinin gəlirlərinin artması və rifah halının yüksəlməsinə də töhfə verə bilər. Agentlik olaraq turizm sahəsində fəaliyyət göstərən bütün ictimai təşkilatlar kimi, kulinariya sahəsində fəaliyyət göstərən ictimai birlikləri də dəstəkləyirik. Hər zaman qeyd etdiyimiz kimi, gücümüz birliyimizdədir. Sənayenin birgə fəaliyyəti çox önəmli faktordur. Eyni hədəfə vurmaq üçün çalışmalıyıq. Agentlik bu istiqamətdə sizə hərtərəfli dəstək verməyə hər zaman hazırdır. Hesab edirik ki, bugünkü konqres, xüsusilə bu cəhətdən mühüm əhəmiyyət kəsb edir”.

Təbirdə çıxış edən gənclər və idman naziri Fərid Qayıbov gənclərin milli mətbəximizin qorunub saxlanması və inkişafında rolunun artırılmasının zəruri olduğunu, dövlətimiz tərəfindən bütün sahələrdə olduğu kimi kulinariya sahəsində də gənclərin fəaliyyətinə şərait yaradıldığını bildirib. Həmçinin nazirlik tərəfindən kulinariya sahəsində çalışan gənclərin beynəlxalq müsabiqələrdə iştirakının dəstəkləndiyini qeyd edib. Bildirib ki, gün ərzində panel iclasların keçirilməsi bu sahədə mövcud olan çatışmazlıqlarının aradan qaldırılmasına kömək edəcək.

Ölkədə gənclərin sayının üstünlük təşkil etdiyini deyən Fərid Qayıbov bildirib ki, gənclərin peşə sahəsində inkişafı olduqca vacibdir. Gənc kulinarların beynəlxalq yarışlarda dəstəklənməsi Gənclər və İdman Nazirliyinin prioritet istiqamətlərindəndir.

Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Azərbaycanda kulinariya sahəsində məşğul olan kiçik və orta sahibkarların inkişafı üçün mövcud dəstək mexanimzlərindən danışıb. O qeyd edib ki, KOBİA tərəfindən restoran və kafe biznesi üzrə sahibkarlar və aşpazlar üçün maliyyə dəstəyi ilə yanaşı, satış mexanizmləri yaradılır ki, bu da yeni biznes mühitinin formalaşması və genişlənməsinə şərait yaradır. O əlavə edib ki, kulinariya sahəsinin dəstəklənməsi həm də turizm üzrə yeni sahibkarlıq subyektlərinin fəaliyyətə başlamasına kömək edir.

“Milli mətbəx deyəndə ağıla dadlı təamlar gəlir. Kulinariya tarixi kökləri ilə, özünəməxsusluğu ilə bizi hər zaman fərəhləndirib. Bu gün milli mətbəximiz artıq dünyada tanınır. Bir çox ölkələrdə, restoranlarda Azərbaycan mətbəxi təqdim olunur”, - deyə Orxan Məmmədov əlavə edib.

Azərbaycan Turizm Bürosunun Baş icraçı direktoru Florian Zenqstşmid beynəlxalq tədbirlərdə Azərbaycanın milli mətbəxinin geniş təbliğatının aparıldığını qeyd edib, qastronomiya turizminin və milli şərabçılıq ənənələrinin tanıtımı üçün enoturizmin inkişaf etdirilməsi istiqamətində görülən tədbirlər haqqında məlumat verib.

Dünya və yerli bazarda qastroturizmin təbliği prosesi barədə məlumat verən Florian Zenqstşmid deyib: “Şərabçılıq sahəsi qastroturizmin tərkibində özünəməxsus yer tutur. Bu sahəsini inkişaf etdirmək üçün bir neçə istiqamətdə fəaliyyət göstərilir. Yerli turistlər üçün milli mətbəx əlçatan olmalıdır. Azərbaycan mətbəxi çoxçeşidlidir və onu bütün regionlarda təqdim etmək lazımdır”.

Azərbaycan Milli Kulinariya Mərkəzinin direktoru Orxan Sadıqov milli mətbəxin qorunmasının ölkəmizin identifikasiyası və milli irsi üçün önəmli amil olduğunu qeyd edib. O, mərkəzin əsas fəaliyyətinin elmi-metodolji bazanın təkmilləşməsinə yönəldiyini, mərkəzin milli mətbəxi təşviq edən, milli yeməklərin reyestrini yaradan qurumlar üçün istinad mərkəzinə çevriləcək elmi mərkəz olmağı hədəflədiyini vurğulayıb: “Milli Kulinariya Mərkəzi özünü bu sahədə görmək istəyən aşpazları və biznes sahiblərini əməkdaşlığa dəvət edir. Çünki kulinariya bizə qalan bir irsdir və büdcəyə gəlir gətirir”.

O, özünü sınamaq istəyənləri mərkəzə dəvət edib: “Biz Milli Kulinariya Mərkəzi olaraq qapımızı hamı üçün açıq qoymuşuq. Özünü bu sahədə sınamaq istəyən hər bir kəs istənilən zaman gələ bilər və onlara dövlət qayğı göstərəcək. Amma nəzərə almaq lazımdır ki, milli mətbəximiz bizim milli irsimizdir”.

Orxan Sadıqovun sözlərinə görə, agentliyin və mərkəzin təşəbbüsü ilə Azərbaycanın bütün səfirliklərində milli mətbəximizdən ibarət guşə açılacaq.

Azərbaycan Kulinariya Mütəxəssisləri Assosiasiyasının sədr müavini Fərhad Aşurbəyli çıxışında assosiasiyanın fəaliyyəti və planlaşdırılan layihələr haqqında məlumat verib. O, kulinarları birləşdirən ictimai təşkilat olaraq bu növ tədbirlərin keçirilməsinə hər zaman önəm verdiklərini və beynəlxalq yarışlarda təmsil olunmağın vacibliyini qeyd edib.

“Caspian Event Organisers” şirkətinin baş direktoru Fərid Məmmədov tədbirin əhəmiyyətindən danışıb və milli kulinariya ənənələrinin yaşadılmasında belə mərasimlərin mühüm rol oynadığını bildirib.

Konqres panel sessiyalarla davam edib və tədbir çərçivəsində tanınmış aşpazlar tərəfindən ustad dərsləri keçirilib