Bakıda kəndirlə mübarizə idman növü üzrə beynəlxalq "Turan Kuboku"nun açılış mərasimi keçirilib.

AZƏRTAC xəbər verir ki, əvvəlcə Ümummilli Lider Heydər Əliyevin və Vətən uğrunda canından keçən şəhidlərin xatirəsi bir dəqiqəlik sükutla yad edilib.

Daha sonra Azərbaycan Respublikasının Dövlət Himni səsləndirilib.

Tədbir bədii hissə ilə davam edib. Burada müxtəlif ölkələrin rəqs növləri izləyicilərə nümayiş etdirilib.

Yarışda 10 ölkə - Azərbaycan, Türkiyə, Qazaxıstan, Türkmənistan, Pakistan, İran, Hindistan, Sudan, Səudiyyə Ərəbistan və Gürcüstan mübarizə aparacaq.

Yarış Kəndirlə Mübarizə İdmanı Cəmiyyətinin, Gənclər və İdman Nazirliyinin, Milli Olimpiya Komitəsinin, Milli İdman Növləri Assosiasiyasının, Avropa Kəndirlə Mübarizə Federasiyasının, həmçinin Beynəlxalq Kəndirlə Mübarizə Federasiyasının birgə təşkilatçılığı ilə keçirilir.