Ailə, Qadın və Uşaq Problemləri üzrə Dövlət Komitəsi və Avropa İttifaqının birgə təşkilatçılığı ilə “Aİ Gender Bərabərliyi naminə: İslahat üzrə Yardım Xidməti” layihəsi çərçivəsində gender məsələləri üzrə məsul şəxslər üçün “Gender Bərabərliyi və İdarəetmə” mövzusunda təlimin açılışı olub.

AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova açılış nitqi ilə çıxış edib. Bildirib ki, ölkəmizdə 2006-cı ildə "Gender (kişi, qadın) bərabərliyinin təminatları haqqında" Qanun qəbul olunduqdan sonra Ailə, Qadın və Uşaq Problemləri üzrə dövlət Komitəsi tərəfindən hər il Milli Məclis qarşısında hesabat verilir.

Qeyd edib ki, ölkədə gender məsələləri ilə bağlı vəziyyəti təhlil etmək üçün müəyyən komitələrə, nazirliklərə və bir sıra şirkətlərə müraciət olunur və artıq müəyyən dövlət qurumlarında gender məsələləri üzrə məsul şəxslər təyin edilib. Komitə sədri diqqətə çatdırıb ki, üç gün ərzində gender məsələləri üzrə məsul şəxslərlə seminar keçiriləcək. Bu seminar gələcəkdə gender məsələləri ilə bağlı daha dolğun məlumatların alınmasına töhfə vermək məqsədi daşıyır.

Avropa İttifaqı (Aİ) Nümayəndəliyinin Beynəlxalq Yardım və Əməkdaşlıq şöbəsinin əməkdaşı Məryəm Hacı-İsmayılova bildirib ki, Aİ bu cür tədbirlərə öz töhfəsini verməyə hazırdır. O deyib ki, seminar iştirakçıları ilə üç gün ərzində gender məsələlərində həm ölkə, həm də beynəlxalq təcrübə üzrə biliklər paylaşılacaq.

Qeyd edək ki, "Gender Bərabərliyi və İdarəetmə" mövzusunda keçirilən təlim nazirliklərin gender məsələləri üzrə məsul şəxslərinin iştirakı ilə keçirilir. Təlimdə “Gender bərabərliyi konsepsiyası və anlayışı”, “Gender bərabərsizliyinin səbəbləri və nəticələri”, “Gender indikatorları və yoxlama alətləri” və digər mövzular üzrə ətraflı məlumatlar əldə olunacaq.