Aprelin 12-də Bakıda Avropa İttifaqının maliyyələşdirdiyi və Birləşmiş Millətlər Təşkilatının İnkişaf Proqramının (BMTİP) icra etdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi çərçivəsində sosial sahibkarlıq ekosistemi üzrə məsələlərin müzakirəsinə həsr edilən seminar keçirilib.

AZƏRTAC xəbər verir ki, tədbirdə BMT-nin İnkişaf Proqramının müvəqqəti işlər vəkili Suhrob Hocimatov, həmçinin qadınların və əlilliyi olan şəxslərin məşğulluğunun dəstəklənməsi, kənd fermerlərinə yardım, region gənclərinin təhsil imkanlarının yaxşılaşdırılması, eləcə də ekoloji xidmətlərin göstərilməsi kimi müxtəlif sahələrdə çalışan sosial sahibkarlar iştirak edirlər. Tədbirə moderatorluğu beynəlxalq ekspert Lana Lovaşiç edib.

Suhrob Hocimatov çıxışında BMTİP tərəfindən sosial sahibkarlığın dəstəkləndiyini, Proqramın Azərbaycana sosial müəssisələrin inkişafına dəstək göstərməkdən məmnun olduğunu bildirib. O, sosial-iqtisadi problemlərin həllində və Dayanıqlı İnkişaf Məqsədlərinin əldə olunmasında sosial sahibkarlıq müəssisələrin vacibliyini diqqətə çatdırıb.

“Dünya kafesi” formatında təşkil edilən tədbir iştirakçılara sosial biznesin idarə edilməsi ilə bağlı təcrübələrini açıq şəkildə bölüşmək və sosial sahibkarlıq ekosisteminin inkişafı yollarını birgə tapmaq imkanı yaradıb.

Seminar Azərbaycanda sosial sahibkarlıq üzrə dəstəkləyici siyasət çərçivəsi yaratmaq üçün ölkənin səylərini sürətləndirməyi hədəfləyir. Belə ki, bu siyasət çərçivəsi daha çox insana sosial-iqtisadi problemlərin həllinə yönələn bizneslərə başlamağa və genişləndirməyə imkan verəcək.