Sentyabrın 19-dan 20-dək Bakıda Rusiya Milli Dram Teatrının (Aleksandrinski Teatrı) “Böyük qastrollar”ı keçirilir. İki gün ərzində Azərbaycan Dövlət Akademik Milli Dram Teatrının səhnəsində tamaşaçılara Nikolay Qoqolun eyniadlı pyesi əsasında hazırlanmış “Evlənmə” tamaşası təqdim olunacaq.

AZƏRTAC xəbər verir ki, bu münasibətlə, cümə axşamı ilk nümayiş başlamazdan əvvəl mətbuat konfransı keçirilib.

Azərbaycan Akademik Milli Dram Teatrının bədii rəhbəri Mehriban Ələkbərzadə Aleksandrinski Teatrının rəhbərliyinə təşəkkür edib. O, iki ölkənin teatrları arasında əməkdaşlığın böyük önəmini qeyd edib.

“Sentyabrın əvvəlində Aleksandrinski Teatrının səhnəsində teatrımızın repertuarından Hüseyn Cavidin faciəsi əsasında hazırlanmış “İblis və...” tamaşası nümayiş etdirildi. Bizi həyəcanlı və isti hisslər bürüdü. Düşünürəm ki, biz bu hissləri “Evlənmə” tamaşasına baxdıqdan sonra yaşayacağıq”, - deyə Azərbaycan teatrının bədii rəhbəri qeyd edib.