Bakıda İsveçin Azərbaycandakı səfirliyi “Libraff” kitab mağazası ilə birgə 1 İyun – Uşaqların Beynəlxalq Müdafiəsi Günü münasibətilə “Zorakılığa yox” adlı sərgi açıb.

AZƏRTAC xəbər verir ki, sərginin ekspozisiyasında uşaqlara zorakılıq tətbiq etmədən sevgi və hörmət göstərməyin vacibliyini vurğulayan məşhur İsveç yazıçısı Astrid Lindqrenin “Zorakılığa yox” adlı çıxışından sitatları yer alıb.

Tədbirdə çıxış edən İsveçin Azərbaycandakı səfiri Tobias Lorentsson Uşaqların Beynəlxalq Müdafiəsi Gününə həsr olunmuş bu təşəbbüsün əhəmiyyətini vurğulayıb:

“Bu gün bizə bütün dünyada uşaqları qorumağın, dəstəkləməyin və onları dinləməyin nə qədər vacib olduğunu xatırladır. Sərgi İsveç İnstitutu tərəfindən hazırlanıb və burada məşhur İsveç yazıçısı Astrid Lindqrenin 1978-ci ildə söylədiyi "Zorakılığa yox" nitqindən vacib fikirlər təqdim olunur. O, uşaqları sevgi və hörmətlə necə tərbiyə etməyin lazım olduğu barədə danışırdı. Təəssüf ki, bu qədər əvvəl deyilmiş sözlər hələ də aktualdır”.

Bildirilib ki, Ümumdünya Səhiyyə Təşkilatının məlumatına əsasən, hər il dünyada 2-17 yaş arasında təxminən 1 milyard uşaq – yəni demək olar ki, hər iki uşaqdan biri zorakılığın hər hansı bir formasına məruz qalır. Sərginin məqsədi bu ciddi problem barədə məlumatlılığı artırmaq, zorakılıqdan uzaq valideynlik modeli və uşaqların müdafiəsi mövzusunda ictimai dialoqa töhfə verməkdir.

Milli Məclisin Ailə, qadın və uşaq məsələləri komitəsinin sədri, deputat Hicran Hüseynova Azərbaycanda uşaqların tərbiyəsi məsələsinə xüsusi həssaslıqla yanaşıldığını diqqətə çatdırıb. Deputat qeyd edib ki, uşaqlara qarşı zorakılıq problemi obyektiv yanaşma tələb edir.

Sərgi iyunun 30-dək davam edəcək.