Martın 4-də Bakıda “Qadın hüquqları yeni ictimai-siyasi reallıqlar kontekstində” mövzusunda konfrans keçirilib.

AZƏRTAC xəbər verir ki, tədbir Ailə, Qadın və Uşaq Problemləri üzrə Dövlət Komitəsinin təşkilatçılığı və Beynəlxalq Münasibətlərin Təhlili Mərkəzinin İdarə Heyətinin üzvü Gülşən Paşayevanın moderatorluğu ilə baş tutub.

Konfransı giriş sözü ilə açan Ailə, Qadın və Uşaq Problemləri üzrə Dövlət Komitəsinin sədri Bahar Muradova Azərbaycanda ictimai-siyasi dialoq üçün əlverişli şərait və sağlam mühit mövcud olduğunu diqqətə çatdırıb.

Komitə sədri bildirib ki, Azərbaycan Vətən müharibəsində Qələbəsi ilə regionda yeni reallıq yaradıb və beynəlxalq aləmdə nüfuzunu artırmaqda davam edir. Regionda yaradılan yeni reallıq və yeni dünya nizamına uyğun olaraq qarşıya yeni vəzifələr qoyulur.

"Azərbaycanda qadın hüquqları milli qanunvericiliklə tənzimlənir və bu sahə üzrə qanunlarda əksini tapan müddəalara əməl edilməsi, problemlərin həll olunması prioritet məsələlərdir. Yeni yanaşmalar və proqramların qəbul edilməsi mütləqdir. Bu istiqamətdə qarşıya müəyyən vəzifələr çıxır. Qadınların ictimai-siyasi həyatda rolu, xüsusilə qızların təhsili ilə bağlı məsələlər daha aktualdır", - deyə Bahar Muradova əlavə edib.

Komitə sədri yeni siyasi konfiqurasiya mühitində konfransın qadın hüquqlarının müdafiəsi işinə töhfə verəcəyinə əminliyini ifadə edib.

Ombudsman Səbinə Əliyeva vurğulayıb ki, Azərbaycanda insan hüquqlarının müdafiəsi, qadınların problemlərinin həlli diqqət mərkəzində saxlanılır.

İnsan hüquqları üzrə müvəkkil bildirib ki, Azərbaycanda uğurlu gender siyasətinin əsası ümummilli lider Heydər Əliyev tərəfindən qoyulub və bu proses Prezident İlham Əliyev tərəfindən uğurla davam etdirilir. Birinci vitse-prezident Mehriban xanım Əliyevanın çoxşaxəli fəaliyyətinin Azərbaycan qadınlarının ölkənin ictimai-siyasi həyatında fəal iştiraka marağının artmasında rolu böyükdür. Mehriban xanım Əliyevanın təşəbbüsü ilə humanitar, elm, təhsil sahələrində həyata keçirilən tədbirlər həm Azərbaycanda, həm də başqa ölkələrdə yaşayan qadınlar üçün əsl örnək, eyni zamanda, onların cəmiyyətdəki rolunun artırılmasına dəstəkdir.

S.Əliyeva diqqətə çatdırıb ki, Ombudsman Aparatı tərəfindən ölkəmizdə insan hüquqlarının müdafiəsi, qadınlara diqqət və qayğının göstərilməsi, onların problemlərinin həlli diqqət mərkəzində saxlanılır.

Onun sözlərinə görə, gender bərabərliyinin səmərəli təmin edilməsi məsələsi əsas çağırışlardan biri kimi qarşıya bir sıra vəzifələr qoyur.

"Qadın sahibkarlığının inkişaf etdirilməsi və bu sahədə qadın sahibkarlar üçün müəyyən güzəştlərin tətbiqi üçün təkliflərimizi vermişik. Məsələn, çalışırıq ki, onlar vergi güzəştlərindən faydalansınlar", - deyə ombudsman əlavə edib.

S.Əliyeva vurğulayıb ki, hazırda dövlətimizin qarşısında duran əsas vəzifə işğaldan azad edilən ərazilərin minalardan təmizlənməsi və bu torpaqlara yenidən həyatın qayıtmasını təmin etməkdir. Bərpa və quruculuq işləri çox yüksək sürətlə aparılır ki, insanlarımız öz evlərinə qayıtsınlar. Hər bir Azərbaycan qadını bu prosesdə fəal iştirak etməlidir.

Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin Siyasi partiyalarla iş sektorunun müdiri Səbinə Salmanova çıxışında qeyd edib ki, ölkəmizdə siyasi partiyalar həmrəylik nümayiş etdirirlər. Bu həmrəyliyin ən gözəl nümunəsi odur ki, partiyaların, xalqımızın Prezidentimizə etimadı çox böyükdür və onun ətrafında sıx birləşib.

S.Salmanova vurğulayıb ki, Azərbaycan qadınları çox fəaldırlar və onlar ictimai-siyasi həyatın bütün sahələrində təmsil olunurlar.

Ölkəmizdə yeni siyasi konfiqurasiyanın formalaşdığını diqqətə çatdıran Prezident Administrasiyasının rəsmisi bildirib: “Məhz bunun nəticəsidir ki, bütün siyasi partiyalar da daxil olmaqla, ümumilikdə Azərbaycan xalqı bir oldu, həmrəy oldu. Dialoq mühüm şərtdir və biz bunu Vətən müharibəsində aydın gördük”.

Konfransda Sosial Rifah Partiyasının sədri Əsli Kazımova “Sosial rifah dövləti və gender bərabərliyi”, Vətəndaş Həmrəyliyi Partiyasının üzvü, Azəri-Türk Qadınlar Birliyinin sədri Tənzilə Rüstəmxanlı “Münaqişədən zərər çəkmiş qadınların hüquqlarının müdafiəsi”, Ailə, Qadın və Uşaq Problemləri üzrə Dövlət Komitəsi yanında İctimai Şuranın sədri, “Vətəndaşların Əmək Hüquqlarını Müdafiə Liqası”nın İcraiyyə Komitəsinin sədri Sahib Məmmədov "Azərbaycanın əmək bazarında qadın təmsilçiliyi”, Rasional İnkişaf Uğrunda Qadınlar Cəmiyyətinin sədri Şəhla İsmayıl “Qadınların inkişafında vətəndaş cəmiyyətinin rolu” və Məclisin Elm və təhsil Komitəsinin, Ailə, qadın və uşaq Komitəsinin və YAP İdarə heyətinin üzvü, tarix üzrə fəlsəfə doktoru, dosent Pərvin Kərimzadə “Təhsil qadın hüquqlarının əsas komponenti kimi” mövzularında çıxış edərək öz fikirlərini bildiriblər.

Tədbirin sonunda “Gənc qızların təhsilinə dəstək” kampaniyasına qoşulmuş özəl sektor nümayəndələri mükafatlandırılıb.