Oktyabrın 8-də Müasir İncəsənət Muzeyində Fransanın “Lalique” manufakturasının 100 illiyi münasibətilə sərgi açılıb.

AZƏRTAC xəbər verir ki, sərgidə “Bacchantes”, “Sirènes”, “Champs-Élysées” kimi vazalar, həmçinin emalatxanalarda onların hazırlanması prosesini əks etdirən fotoşəkillər nümayiş etdirilib.

Şirkətin təmsilçisi Kler Beruar “Lalique”in yaranma tarixindən və orada istehsal olunan məhsullar barədə tədbir iştirakçılarına məlumat verib. Uzun illərdir “Lalique”də çalışdığını deyən Kler Beruar Bakıya gəlişinin səbəbini açıqlayıb. Bildirib ki, “İtaldizain” “Lalique”i Azərbaycanda təmsil etdiyi üçün Bakıya gəlib: “Bu il həm də “Lalique”in 100 illik yubileyi tamam olur. Rene Lalik 1922 ildə Fransanın şərqində ilk dəfə istehsalata başlamışdır. O, şirkəti açarkən 61 yaşı var idi. Əgər Rene Lalik indi yaşamış olsaydı qürurla deyərdi ki, onun şirkəti indiyədək fəaliyyət göstərir”.

Fabrikdə 250 nəfər işçinin çalışdığını deyən Kler Beruar bildirib ki, bütün xrustal və vazalar əvvəldən axıradək “Lalique”in emalatxanalarında hazırlanır. Şirkət ildə 250-400 min arası məhsul istehsal edir və bir nəfərin istehsal prosesini mənimsəməsi təxminən 10 il vaxt tələb edir.

Qeyd edib ki, sərgi zalında yeni “Blue” kolleksiyası nümayiş olunur. Digər otaqlarda Rene Lalikin yaşadığı dövrdə şəxsən yaratdığı əsərlər də sərgilənir.

Kler Beruar sərgiyə maraq göstərdikləri üçün iştirakçılara təşəkkürünü bildirib.

Rəssam Miraslan Zeyni bildirib ki, hər dəfə Müasir İncəsənət Muzeyinə gələndə yeni duyğular keçirir: “Muzey canlıdır, çünki muzeyin kolleksiyası daim yenilənir. Bugünkü tədbir məni maraqlı bir düşüncəyə gətirir, çünki bir gözəllik 100 il yaşayırsa deməli bu mədəniyyətin gələcəyi var. Gözəllik və mədəniyyət hər bir xalqın mirasıdır və yeni nəsillərə ötürmək üçün qiymətsiz bir dəyərdir”.

Qeyd edək ki, eksponatlar arasında ən çox diqqət çəkən əsərlərdən biri də “Champs-Élysées” kasasıdır ki, üzərində ağac cərgələrinin büllur yarpaqları Parisin mahiyyətini əks etdirir. Bu rəmzi sənət əsəri 1951-ci ildə Mark Lalik tərəfindən tərtib edilib. Bu gün isə “Lalique” brendi qızıl parıltı texnikası ilə ona yeni nəfəs bəxş edib.

1927-ci ildə ustad Rene Lalikin sonsuz təxəyyülü və yaradıcı dühası “Bacchantes” güldanının ərsəyə gəlməsinə səbəb olub.

İkonik dizaynda hazırlanmış əsərin üzərində şəhvətli gözəllik və vücudlara sahib olan gənc Vakxa menadaları həkk olunub. Misilsiz sənət əsəri olan güldanın əzəməti və sensuallığı pərəstişkarlarını heyran etməyə davam edir. Bu güldan Lalique brendinin məşhur rəmzinə çevrilmiş və bütün dünyada ən çox satılan məhsul olaraq qalır.

Rene Lalik 1927-ci ildə “Sirènes” kolleksiyasını tərtib etmək üçün mifoloji mənbələri araşdırmağa başlayır və sonda on Vakxa qadınını şüşə üzərində təsvir edir. Düz doxsan il sonra amerikalı rəssam Terri Rocers Lalikin əfsanəvi Vakxa qadınlarına yeni nəfəs gətirir