Azərbaycan Milli İncəsənət Muzeyi fiziki məhdudiyyətli uşaq və gənclərin muzey həyatına, sosial və mədəni mühitə cəlb edilməsi istiqamətində Uşaq İnkişaf Mərkəzi ilə birlikdə yeni layihəyə başlayıb.

AZƏRTAC xəbər verir ki, yanvarın 10-da İncəsənət Muzeyində “İstedadın çalarları” adlı layihənin təqdimatı olub.

Təqdimat çərçivəsində gənc rəssamlar Fuad Musayev və Aytac Quliyevanın sərgisi açılıb və ölkəmizdə Daun sindromlu yeganə tarzən Bəhram Rahimlinin konsert proqramı təqdim edilib.

AZƏRTAC-ın müxbiri ilə söhbət zamanı Bəhram Rahimlinin anası Mehbarə xanım oğlunun tara marağının kiçik yaşlardan başladığını deyib: “Bəhramın musiqi savadı yox idi, lakin onun müəllimi Vüsal İskəndərzadə onu həvəsləndirirdi. Bəhram notları bilmir, amma sırf yaddaşla, o, bu gün burada konsert verir. Tar çox çətin bir alətdir və belə bir özəl uşağın tarda çalmağı təqdirəlayiq haldır. Məqsədim Daun sindromlu uşaqlara stimul verməkdir”.

Tədbirdə çıxış edən Azərbaycan Milli İncəsənət Muzeyi direktorunun müavini Nəzrin Şirinova, Əməkdar artist, tarzən Vüsal İskəndərzadə və Bəhram Rahimlinin psixoloqu Murad Musayev fiziki məhdudiyyətli uşaqların cəmiyyətə inteqrasiya olunmasından, bu yolda bir çox layihələrin həyata keçməsindən danışıblar. Təşkilatçılar tərəfindən inklüziv layihələr həyata keçirən digər mərkəzlərin də bu layihəyə qoşulmasının arzuolunan olduğu vurğulanıb.

Sonra Bəhram Rahimlinin tarda ifası tamaşaçılara xoş ovqat bəxş edib. Konsert proqramında, həmçinin Qara Qarayev adına Mərkəzi İncəsənət Məktəbinin əlaçı şagirdi, bir sıra müsabiqələr laureatı Jalə Musayeva piano musiqiləri səsləndirib.

Tədbir çərçivəsində gənc rəssamlar Fuad Musayev və Aytac Quliyeva tərəfindən 3 nömrəli Respublika xüsusi internat məktəbinin uşaqları üçün ustad dərsi keçirilib.

Qeyd edək ki, sağlamlıq imkanları məhdud olan uşaq və gənclərin yaradıcı qabiliyyətlərinin üzə çıxarılması, dəstəklənməsi, onların cəmiyyətdə tanıdılması məqsədi daşıyan layihə hər ay keçiriləcək.