Aprelin 28-də Bakı Slavyan Universitetində Azərbaycan Rəssamlar İttifaqı ilə birgə Xalq rəssamı, professor Arif Hüseynovun əsərlərindən ibarət “Şuşanın görkəmli musiqi xadimləri” adlı sərgi açılıb.

AZƏRTAC xəbər verir ki, tədbirdə Azərbaycanın görkəmli mədəniyyət, elm və incəsənət xadimləri, Milli Məclisin deputatları, ziyalılar, universitetin müəllim və tələbə heyəti iştirak edib.

Tədbirdə Vətən müharibəsində həlak olmuş şəhidlərimizin xatirəsini bir dəqiqəlik sükutla yad olunub.

Bakı Slavyan Universitetinin professoru, Əməkdar jurnalist Etibar Babayev iştirakçılara sərgi barədə qısa məlumat verib. Bildirib ki, Xalq rəssam Arif Hüseynovun yaradıcılığında Qarabağ mövzusu çox geniş yer alıb. Onun silsilə “Qarabağnamə” əsərləri dünyanın müxtəlif yerlərində mötəbər sərgilərdə nümayiş olunub.

Tədbir iştirakçılarını, qonaqları salamlayan universitetin rektor Anar Nağıyevə rəhbərlik etdiyi ali təhsil ocağında “Şuşa İli” çərçivəsində bu qəbildən bir çox tədbirlərin keçirildiyini bildirib. Bu qəbildən olan “Şuşanın görkəmli musiqi xadimləri” sərgisinin əhəmiyyətindən danışan rektoru Xalq rəssamı, professor Arif Hüseynovun yaradıcılığını yüksək qiymətləndirib və onun Qarabağ mövzusuna xüsusi həssaslıqla yanaşdığını vurğulayıb.

Milli Məclisin Mədəniyyət komitəsinin sədri Qənirə Paşayeva Vətən müharibəsində Ali Baş Komandan İlham Əliyevin rəhbərliyi ilə xalqımızın rəşadətli Qələbəsindən geniş danışaraq bu Qələbədə payı olan hər bir azərbaycanlını təbrik edib.

Sərgi ilə bağlı fikirlərini bölüşən komitə sədri uğurlu layihə münasibətilə rəssamı təbrik edib.

Tədbirdə çıxış edən digər natiqlər də “Şuşanın görkəmli musiqi xadimləri” adlı rəsm sərgisinin əhəmiyyətindən danışıblar. Qeyd edilib ki, sərgidə nümayiş olunan əsərlərdə Şuşanın musiqi mədəniyyətinin korifeylərinin portretləri əks edilir. Tarixi mötəbərlik Arif Hüseynovun yaradıcılığında xüsusi əhəmiyyət kəsb edir. Rəssamın maraq dairəsi çox genişdir. O, uğurla həm klassik, həm də çağdaş ədəbiyyat nümunələrinə illüstrasiyalar çəkir. Ədəbi qəhrəmanları asanlıqla təxəyyülündə canlandıra, ifadəli cizgilərlə onlara obrazlı görkəm verə bilir. Sərgi silsiləsinə daxil olan əsərləri göstərir ki, Arif Hüseynov özündə ənənə ilə müasirliyin bədii vəhdətini yaşadan fərdi ifadə üslubunu yaratdığını sərgiləyə bilib.

Sonda bütün iştirakçılara və çıxışçılara təşəkkürünü bildirən Arif Hüseynov ali təhsil ocağında sərgilənən əsərlərini universitetə bağışlayıb.

Sərgi izləyicilər tərəfindən maraqla qarşılanıb.

Ətraflı