Mayın 15-də Bakı Musiqi Akademiyasında L. və M. Rostropoviçlər adına 21 nömrəli tam orta musiqi məktəbinin hesabat konserti keçirilib.

Konsert proqramının nümayişindən əvvəl AZƏRTAC-a açıqlama verən məktəbin direktoru Məmməd Quliyev bildirib ki, tədbir dahi bəstəkar Üzeyir Hacıbəylinin 140 illiyinə həsr olunub.

“Konsertdə məktəbimizin istedadlı şagirdləri çıxış edirlər. Proqramda ümumilikdə 24 solo musiqi nömrəsi yer alıb. İyunun 14-də Azərbaycan Dövlət Akademik Filarmoniyasında keçiriləcək növbəti tədbiri orkestr müşayiət edəcək”,- deyə o, əlavə edib.

Tədbirdə dünya şöhrətli bəstəkarlar Cüzeppe Verdinin “Aida”, Pyotor Çaykovskinin “Qu-quşu”, Ferens Listin “Macar raspodiyası” N2 cis moll, Frederik Şopenin “Ballada” N1 g-moll və digər əsərlər şagirdlərin ifasında təqdim olunub.