Bu gün Bakı Kitab Mərkəzində 21 İyun – Beynəlxalq Yoqa Gününə həsr olunmuş “Yoqa və sağlamlıq” kitabının təkmilləşdirilmiş üçüncü nəşrinin və yoqa kartları dəstinin təqdimat mərasimi keçirilib.

AZƏRTAC xəbər verir ki, tədbirdə yoqa təlimçiləri, sağlam həyat tərzi üzrə mütəxəssislər, ziyalılar, ictimai xadimlər, media nümayəndələri və çoxsaylı yoqa həvəskarları iştirak ediblər.

Təqdimat mərasiminin əsas məqsədi yoqanın sağlam həyat tərzinin formalaşdırılmasında rolunu geniş ictimaiyyətə çatdırmaq, bu sahədə Azərbaycan dilində hazırlanmış yeni nəşrləri təqdim etmək və cəmiyyətin sağlamlıq mədəniyyətinin yüksəldilməsinə töhfə vermək olub.

Tədbirin aparıcısı Muxtar Səttarov təqdimatın məqsədi barədə ətraflı məlumat verib.

Bakı Kitab Mərkəzinin direktoru Günel Rzayeva çıxış edərək müəllifi yeni nəşr münasibətilə təbrik edib, kitabın və yoqa mədəniyyətinin cəmiyyət üçün əhəmiyyətini vurğulayıb.

Tədbirdə çıxış edən müəllif Vahid Novruzov bildirib ki, “Yoqa və sağlamlıq” kitabı onun 30 ildən artıq yoqa təcrübəsinin, uzunmüddətli müşahidələrinin və araşdırmalarının nəticəsidir.

Müəllif bildirib ki, kitabın ilk nəşri 2013-cü ildə, ikinci nəşri isə 2018-ci ildə çap olunub. Oxucuların böyük marağı, müəllifin son illərdə apardığı araşdırmalar və əldə etdiyi yeni praktik təcrübə nəzərə alınaraq, kitab yenidən işlənib, genişləndirilib və təkmilləşdirilmiş üçüncü nəşri 2025-ci ildə işıq üzü görüb. Yeni nəşrdə qədim yoqa klassiklərinin əsərlərinə istinadlar artırılıb, yoqanın fəlsəfi əsasları daha geniş izah olunub, sağlamlıq üçün tövsiyə edilən asanaların tərkibi yenilənib, onların icra qaydaları və tətbiq prinsipləri daha dolğun şəkildə təqdim edilib.

Onun sözlərinə görə, kitab yalnız fiziki hərəkətlər toplusu deyil, insanın fiziki, psixoloji və mənəvi inkişafına xidmət edən həyat fəlsəfəsidir. Nəşrdə yoqanın insan sağlamlığına təsiri, düzgün nəfəsalma, rasional qidalanma, daxili tarazlığın bərpası, stresin idarə olunması, immun sisteminin möhkəmləndirilməsi, sosial münasibətlərdə harmoniyanın yaradılması və həyat keyfiyyətinin yüksəldilməsi kimi mühüm mövzular əhatə olunur.

Tədbirin diqqətçəkən yeniliklərindən biri də “Yoqa və sağlamlıq” kitabı əsasında hazırlanmış 84 kartdan ibarət yoqa kartları dəstinin təqdimatı olub. Kartlar kitabın üçüncü nəşrində yer alan yoqa vəziyyətləri (asanalar), etik davranış prinsipləri və müxtəlif aforizmlər əsasında hazırlanıb. Layihənin müəllifi Afiqə Bayramova bildirib ki, kartların hər birinin ön hissəsində müvafiq asananın şəkli, arxa hissəsində isə onun yerinə yetirilmə qaydaları, müddəti və praktik tövsiyələr təqdim olunub. Layihənin əsas məqsədi yoqa həvəskarlarına istənilən şəraitdə müstəqil şəkildə məşğul olmaq, bilikləri daha rahat mənimsəmək və sağlam həyat tərzinə dair maarifləndirici məlumatlar əldə etmək imkanı yaratmaqdır.

Təqdimat çərçivəsində çıxış edən tanınmış yoqa təlimçiləri və qonaqlar kitabın Azərbaycan dilində bu sahədə hazırlanmış ən əhatəli nəşrlərdən biri olduğunu bildirərək onun həm yeni başlayanlar, həm də peşəkar yoqa praktikləri üçün dəyərli vəsait olduğunu qeyd ediblər.

Tədbirin sonunda iştirakçılar müəllifə suallar ünvanlayıb, kitabın hazırlanma prosesi, yoqanın Azərbaycanda inkişaf perspektivləri və yeni layihələr ətrafında fikir mübadiləsi aparılıb. Daha sonra müəllif tərəfindən kitabların imzalanması və xatirə şəkillərinin çəkilməsi təşkil olunub.

Tədbirdə bildirilib ki, “Yoqa və sağlamlıq” kitabının və yoqa kartları dəstinin satışından əldə ediləcək bütün gəlir sahibsiz heyvanların qorunması ilə məşğul olan ictimai təşkilatlara ianə ediləcək. Bu təşəbbüs layihənin yalnız maarifləndirici deyil, həm də sosial məsuliyyət daşıyan bir missiyaya xidmət etdiyini göstərir.

“Yoqa və sağlamlıq” kitabının yeni nəşri və onun əsasında hazırlanmış yoqa kartları dəsti Azərbaycanda sağlam həyat tərzinin təbliği, fiziki və mənəvi sağlamlığın qorunması, eləcə də yoqa mədəniyyətinin inkişafı istiqamətində mühüm addımlardan biridir. Layihə həm maarifləndirmə, həm də praktik tətbiq baxımından ölkəmizdə yoqa sahəsində yeni mərhələnin başlanğıcı kimi qiymətləndirilir.