Gənc yazarlar və jurnalistlər arasında “Şanlı Zəfər yolumuz” mövzusunda “Ən yaxşı yazı” müsabiqəsinin qalibləri arasında Vətən müharibəsinin şəhidi Oqtay Səfərovun bacısının və qazimizin olması bizi hədsiz qürurlandırdı və duyğulandırdı. Onlar bizim üçün, bu torpaq və Vətən üçün canlarından keçiblər. Şəhidlik zirvəsinə ucalan qəhrəmanlarımızın və onların valideynlərinin qarşısında baş əyirik.

AZƏRTAC xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova “Şanlı Zəfər yolumuz” mövzusunda yazı müsabiqəsi qaliblərinin mükafatlandırılması mərasimi ilə bağlı keçirilən tədbirdən sonra jurnalistlərə müsahibəsində deyib.

Bahar Muradova diqqətə çatdırıb ki, Ailə, Qadın və Uşaq Problemləri üzrə Dövlət Komitəsi (AQUPDK) 2009-cu ildən etibarən hər ilin aprel-may aylarında ümummilli lider Heydər Əliyevin xatirəsinə həsr olunmuş müxtəlif mövzularda yazı müsabiqələri təşkil edir. Koronavirus (COVID-19) pandemiyası ilə əlaqədar builki müsabiqənin mövzusunda dəyişiklik edilib. Pandemiya ilə mübarizə tədbirlərində həkimlərin, tibb işçilərinin, polis və fövqəladə hallar orqanları əməkdaşlarının əhalinin təhlükəsizliyinin və ictimai asayişin qorunmasında rolunu nəzərə alaraq bu müsabiqə “Görünməyən qəhrəmanlar” mövzusunda təşkil edilib.

2020-ci ilin ölkəmizin və xalqımızın tarixinə qızıl hərflərlə yazıldığını qeyd edən komitə sədri vurğulayıb : “Prezident, Müzəffər Ali Baş Komandan İlham Əliyevin rəhbərliyi ilə rəşadətli Ordumuz Vətən müharibəsində böyük Zəfər qazandı. Azərbaycanın yenidən tarixi torpaqlarına qovuşması hər birimizi qürurlandırır və sevindirir. Biz bu Zəfərin təntənəsini yaşayırıq. Böyük Zəfərimizin bünövrəsində ulu öndər Heydər Əliyevin ideyaları və tövsiyələri dayanır. Ümummilli Liderin ən böyük arzusu torpaqlarımızın işğaldan azad edilməsi idi”.

Komitə sədri diqqətə çatdırıb ki, yazı müsabiqələrinin təşkili ölkəmizin əldə etdiyi uğurları təbliğ etməklə yanaşı, həm də gənclərin vətənpərvərlik ruhunda tərbiyə olunmasına şərait yaradır.